ସିଦ୍ଧିଲକ୍ଷ୍ମୀସ୍ତୋତ୍ରମ୍

 ସିଦ୍ଧିଲକ୍ଷ୍ମୀସ୍ତୋତ୍ରମ୍ 

ଶ୍ରୀ ଗଣେଶାୟ ନମଃ ।

ଓଁ ଅସ୍ୟ ଶ୍ରୀସିଦ୍ଧିଲକ୍ଷ୍ମୀସ୍ତୋତ୍ରସ୍ୟ ହିରଣ୍ୟଗର୍ଭ ଋଷିଃ,

ଅନୁଷ୍ଟୁପ୍ ଛନ୍ଦଃ, ସିଦ୍ଧିଲକ୍ଷ୍ମୀର୍ଦେବତା, ମମ ସମସ୍ତ

ଦୁଃଖକ୍ଲେଶପୀଡାଦାରିଦ୍ର୍ୟବିନାଶାର୍ଥଂ

ସର୍ୱଲକ୍ଷ୍ମୀପ୍ରସନ୍ନକରଣାର୍ଥଂ

ମହାକାଲୀମହାଲକ୍ଷ୍ମୀମହାସରସ୍ୱତୀଦେବତାପ୍ରୀତ୍ୟର୍ଥଂ ଚ

ସିଦ୍ଧିଲକ୍ଷ୍ମୀସ୍ତୋତ୍ରଜପେ ବିନିୟୋଗଃ ।

ଓଁ ସିଦ୍ଧିଲକ୍ଷ୍ମୀ ଅଙ୍ଗୁଷ୍ଠାଭ୍ୟାଂ ନମଃ ।

ଓଁ ହ୍ରୀଂ ବିଷ୍ଣୁହୃଦୟେ ତର୍ଜନୀଭ୍ୟାଂ ନମଃ ।

ଓଁ କ୍ଲୀଂ ଅମୃତାନନ୍ଦେ ମଧ୍ୟମାଭ୍ୟାଂ ନମଃ ।

ଓଁ ଶ୍ରୀଂ ଦୈତ୍ୟମାଲିନୀ ଅନାମିକାଭ୍ୟାଂ ନମଃ ।

ଓଁ ତଂ ତେଜଃପ୍ରକାଶିନୀ କନିଷ୍ଠିକାଭ୍ୟାଂ ନମଃ ।

ଓଁ ହ୍ରୀଂ କ୍ଲୀଂ ଶ୍ରୀଂ ବ୍ରାହ୍ମୀ ବୈଷ୍ଣବୀ ମାହେଶ୍ୱରୀ

କରତଲକରପୃଷ୍ଠାଭ୍ୟାଂ ନମଃ । ଏବଂ ହୃଦୟାଦିନ୍ୟାସଃ ।

ଓଁ ସିଦ୍ଧିଲକ୍ଷ୍ମୀ ହୃଦୟାୟ ନମଃ ।

ଓଁ ହ୍ରୀଂ ବୈଷ୍ଣବୀ ଶିରସେ ସ୍ୱାହା ।

ଓଁ କ୍ଲୀଂ ଅମୃତାନନ୍ଦେ ଶିଖାୟୈ ବୌଷଟ୍ ।

ଓଁ ଶ୍ରୀଂ ଦୈତ୍ୟମାଲିନୀ କବଚାୟ ହୁମ୍ ।

ଓଁ ତଂ ତେଜଃପ୍ରକାଶିନୀ ନେତ୍ରଦ୍ୱୟାୟ ବୌଷଟ୍ ।

ଓଁ ହ୍ରୀଂ କ୍ଲୀଂ ଶ୍ରୀଂ ବ୍ରାହ୍ମୀଂ ବୈଷ୍ଣବୀଂ ଫଟ୍ ॥ ଅଥ ଧ୍ୟାନମ୍ ॥

ବ୍ରାହ୍ମୀଂ ଚ ବୈଷ୍ଣବୀଂ ଭଦ୍ରାଂ ଷଡ୍ଭୁଜାଂ ଚ ଚତୁର୍ମୁଖାମ୍ ।

ତ୍ରିନେତ୍ରାଂ ଚ ତ୍ରିଶୂଲାଂ ଚ ପଦ୍ମଚକ୍ରଗଦାଧରାମ୍ ॥ ୧॥

ପୀତାମ୍ବରଧରାଂ ଦେବୀଂ ନାନାଲଙ୍କାରଭୂଷିତାମ୍ ।

ତେଜଃପୁଞ୍ଜଧରାଂ ଶ୍ରେଷ୍ଠାଂ ଧ୍ୟାୟେଦ୍ବାଲକୁମାରିକାମ୍ ॥ ୨॥

ଓଁକାରଲକ୍ଷ୍ମୀରୂପେଣ ବିଷ୍ଣୋର୍ହୃଦୟମବ୍ୟଯମ୍ ।

ବିଷ୍ଣୁମାନନ୍ଦମଧ୍ୟସ୍ଥଂ ହ୍ରୀଙ୍କାରବୀଜରୂପିଣୀ ॥ ୩॥

ଓଁ କ୍ଲୀଂ ଅମୃତାନନ୍ଦଭଦ୍ରେ ସଦ୍ୟ ଆନନ୍ଦଦାୟିନୀ ।

ଓଁ ଶ୍ରୀଂ ଦୈତ୍ୟଭକ୍ଷରଦାଂ ଶକ୍ତିମାଲିନୀ ଶତ୍ରୁମର୍ଦିନୀ ॥ ୪॥

ତେଜଃପ୍ରକାଶିନୀ ଦେବୀ ବରଦା ଶୁଭକାରିଣୀ ।

ବ୍ରାହ୍ମୀ ଚ ବୈଷ୍ଣବୀ ଭଦ୍ରା କାଲିକା ରକ୍ତଶାମ୍ଭବୀ ॥ ୫॥

ଆକାରବ୍ରହ୍ମରୂପେଣ ଓଁକାରଂ ବିଷ୍ଣୁମବ୍ୟଯମ୍ ।

ସିଦ୍ଧିଲକ୍ଷ୍ମି ପରାଲକ୍ଷ୍ମି ଲକ୍ଷ୍ୟଲକ୍ଷ୍ମି ନମୋଽସ୍ତୁତେ ॥ ୬॥

ସୂର୍ୟକୋଟିପ୍ରତୀକାଶଂ ଚନ୍ଦ୍ରକୋଟିସମପ୍ରଭମ୍ ।

ତନ୍ମଧ୍ୟେ ନିକରେ ସୂକ୍ଷ୍ମଂ ବ୍ରହ୍ମରୂପବ୍ୟବସ୍ଥିତମ୍ ॥ ୭॥

ଓଁକାରପରମାନନ୍ଦଂ କ୍ରିୟତେ ସୁଖସମ୍ପଦା ।

ସର୍ୱମଙ୍ଗଲମାଙ୍ଗଲ୍ୟେ ଶିବେ ସର୍ୱାର୍ଥସାଧିକେ ॥ ୮॥

ପ୍ରଥମେ ତ୍ର୍ୟମ୍ବକା ଗୌରୀ ଦ୍ୱିତୀୟେ ବୈଷ୍ଣବୀ ତଥା ।

ତୃତୀୟେ କମଲା ପ୍ରୋକ୍ତା ଚତୁର୍ଥେ ସୁରସୁନ୍ଦରୀ ॥ ୯॥

ପଞ୍ଚମେ ବିଷ୍ଣୁପତ୍ନୀ ଚ ଷଷ୍ଠେ ଚ ବୈଏଷ୍ଣବୀ ତଥା ।

ସପ୍ତମେ ଚ ବରାରୋହା ଅଷ୍ଟମେ ବରଦାୟିନୀ ॥ ୧୦॥

ନବମେ ଖଡ୍ଗତ୍ରିଶୂଲା ଦଶମେ ଦେବଦେବତା ।

ଏକାଦଶେ ସିଦ୍ଧିଲକ୍ଷ୍ମୀର୍ଦ୍ୱାଦଶେ ଲଲିତାତ୍ମିକା ॥ ୧୧॥

ଏତତ୍ସ୍ତୋତ୍ରଂ ପଠନ୍ତସ୍ତ୍ୱାଂ ସ୍ତୁବନ୍ତି ଭୁବି ମାନବାଃ ।

ସର୍ୱୋପଦ୍ରବମୁକ୍ତାସ୍ତେ ନାତ୍ର କାର୍ୟା ବିଚାରଣା ॥ ୧୨॥

ଏକମାସଂ ଦ୍ୱିମାସଂ ବା ତ୍ରିମାସଂ ଚ ଚତୁର୍ଥକମ୍ ।

ପଞ୍ଚମାସଂ ଚ ଷଣ୍ମାସଂ ତ୍ରିକାଲଂ ଯଃ ପଠେନ୍ନରଃ ॥ ୧୩॥

ବ୍ରାହ୍ମଣାଃ କ୍ଲେଶତୋ ଦୁଃଖଦରିଦ୍ରା ଭୟପୀଡିତାଃ ।

ଜନ୍ମାନ୍ତରସହସ୍ରେଷୁ ମୁଚ୍ୟନ୍ତେ ସର୍ୱକ୍ଲେଶତଃ ॥ ୧୪॥

ଅଲକ୍ଷ୍ମୀର୍ଲଭତେ ଲକ୍ଷ୍ମୀମପୁତ୍ରଃ ପୁତ୍ରମୁତ୍ତମମ୍ ।

ଧନ୍ୟଂ ଯଶସ୍ୟମାୟୁଷ୍ୟଂ ବହ୍ନିଚୌରଭୟେଷୁ ଚ ॥ ୧୫॥

ଶାକିନୀଭୂତବେତାଲସର୍ୱବ୍ୟାଧିନିପାତକେ ।

ରାଜଦ୍ୱାରେ ମହାଘୋରେ ସଙ୍ଗ୍ରାମେ ରିପୁସଙ୍କଟେ ॥ ୧୬॥

ସଭାସ୍ଥାନେ ଶ୍ମଶାନେ ଚ କାରାଗେହାରିବନ୍ଧନେ ।

ଅଶେଷଭୟସମ୍ପ୍ରାପ୍ତୌ ସିଦ୍ଧିଲକ୍ଷ୍ମୀଂ ଜପେନ୍ନରଃ ॥ ୧୭॥

ଈଶ୍ୱରେଣ କୃତଂ ସ୍ତୋତ୍ରଂ ପ୍ରାଣିନାଂ ହିତକାରଣମ୍ ।

ସ୍ତୁବନ୍ତି ବ୍ରାହ୍ମଣା ନିତ୍ୟଂ ଦାରିଦ୍ର୍ୟଂ ନ ଚ ବର୍ଧତେ ॥ ୧୮॥

ଯା ଶ୍ରୀଃ ପଦ୍ମବନେ କଦମ୍ବଶିଖରେ ରାଜଗୃହେ କୁଞ୍ଜରେ

ଶ୍ୱେତେ ଚାଶ୍ୱୟୁତେ ବୃଷେ ଚ ଯୁଗଲେ ଯଜ୍ଞେ ଚ ଯୂପସ୍ଥିତେ ।

ଶଙ୍ଖେ ଦେବକୁଲେ ନରେନ୍ଦ୍ରଭବନୀ ଗଙ୍ଗାତଟେ ଗୋକୁଲେ

ସା ଶ୍ରୀସ୍ତିଷ୍ଠତୁ ସର୍ୱଦା ମମ ଗୃହେ ଭୂୟାତ୍ସଦା ନିଶ୍ଚଲା ॥ ୧୯॥

॥ ଇତି ଶ୍ରୀବ୍ରହ୍ମାଣ୍ଡପୁରାଣେ ଈଶ୍ୱରବିଷ୍ଣୁସମ୍ବାଦେ ଦାରିଦ୍ର୍ୟନାଶନଂ

ସିଦ୍ଧିଲକ୍ଷ୍ମୀସ୍ତୋତ୍ରଂ ସମ୍ପୂର୍ଣମ୍ ॥

.