ଶ୍ରୀମହାଲକ୍ଷ୍ମୀକବଚମ୍
ଶ୍ରୀମହାଲକ୍ଷ୍ମୀକବଚମ୍
ଶ୍ରୀ ଗଣେଶାୟ ନମଃ ।
ଅସ୍ୟ ଶ୍ରୀମହାଲକ୍ଷ୍ମୀକବଚମନ୍ତ୍ରସ୍ୟ ବ୍ରହ୍ମା ଋଷିଃ ଗାୟତ୍ରୀ ଛନ୍ଦଃ
ମହାଲକ୍ଷ୍ମୀର୍ଦେବତା ମହାଲକ୍ଷ୍ମୀପ୍ରୀତ୍ୟର୍ଥଂ ଜପେ ବିନିୟୋଗଃ ।
ଇନ୍ଦ୍ର ଉବାଚ । ସମସ୍ତକବଚାନାଂ ତୁ ତେଜସ୍ୱି କବଚୋତ୍ତମମ୍ ।
ଆତ୍ମରକ୍ଷଣମାରୋଗ୍ୟଂ ସତ୍ୟଂ ତ୍ୱଂ ବ୍ରୂହି ଗୀଷ୍ପତେ ॥ ୧॥
ଶ୍ରୀଗୁରୁରୁବାଚ । ମହାଲକ୍ଷ୍ମ୍ୟାସ୍ତୁ କବଚଂ ପ୍ରବକ୍ଷ୍ୟାମି ସମାସତଃ ।
ଚତୁର୍ଦଶସୁ ଲୋକେଷୁ ରହସ୍ୟଂ ବ୍ରହ୍ମଣୋଦିତମ୍ ॥ ୨॥
ବ୍ରହ୍ମୋବାଚ । ଶିରୋ ମେ ବିଷ୍ଣୁପତ୍ନୀ ଚ ଲଲାଟମମୃତୋଦ୍ଭବା ।
ଚକ୍ଷୁଷୀ ସୁବିଶାଲାକ୍ଷୀ ଶ୍ରବଣେ ସାଗରାମ୍ବୁଜା ॥ ୩॥
ଘ୍ରାଣଂ ପାତୁ ବରାରୋହା ଜିହ୍ୱାମାମ୍ନାୟରୂପିଣୀ ।
ମୁଖଂ ପାତୁ ମହାଲକ୍ଷ୍ମୀଃ କଣ୍ଠଂ ବୈକୁଣ୍ଠବାସିନୀ ॥ ୪॥
ସ୍କନ୍ଧୌ ମେ ଜାନକୀ ପାତୁ ଭୁଜୌ ଭାର୍ଗବନନ୍ଦିନୀ ।
ବାହୂ ଦ୍ୱୌ ଦ୍ରବିଣୀ ପାତୁ କରୌ ହରିବରାଙ୍ଗନା ॥ ୫॥
ବକ୍ଷଃ ପାତୁ ଚ ଶ୍ରୀର୍ଦେବୀ ହୃଦୟଂ ହରିସୁନ୍ଦରୀ ।
କୁକ୍ଷିଂ ଚ ବୈଷ୍ଣବୀ ପାତୁ ନାଭିଂ ଭୁବନମାତୃକା ॥ ୬॥
କଟିଂ ଚ ପାତୁ ବାରାହୀ ସକ୍ଥିନୀ ଦେବଦେବତା ।
ଊରୂ ନାରାୟଣୀ ପାତୁ ଜାନୁନୀ ଚନ୍ଦ୍ରସୋଦରୀ ॥ ୭॥
ଇନ୍ଦିରା ପାତୁ ଜଙ୍ଘେ ମେ ପାଦୌ ଭକ୍ତନମସ୍କୃତା ।
ନଖାନ୍ ତେଜସ୍ୱିନୀ ପାତୁ ସର୍ୱାଙ୍ଗଂ କରୂଣାମୟୀ ॥ ୮॥
ବ୍ରହ୍ମଣା ଲୋକରକ୍ଷାର୍ଥଂ ନିର୍ମିତଂ କବଚଂ ଶ୍ରିୟଃ ।
ଯେ ପଠନ୍ତି ମହାତ୍ମାନସ୍ତେ ଚ ଧନ୍ୟା ଜଗତ୍ତ୍ରୟେ ॥ ୯॥
କବଚେନାବୃତାଙ୍ଗନାଂ ଜନାନାଂ ଜୟଦା ସଦା ।
ମାତେବ ସର୍ୱସୁଖଦା ଭବ ତ୍ୱମମରେଶ୍ୱରୀ ॥ ୧୦॥
ଭୂୟଃ ସିଦ୍ଧିମବାପ୍ନୋତି ପୂର୍ୱୋକ୍ତଂ ବ୍ରହ୍ମଣା ସ୍ୱୟମ୍ ।
ଲକ୍ଷ୍ମୀର୍ହରିପ୍ରିୟା ପଦ୍ମା ଏତନ୍ନାମତ୍ରୟଂ ସ୍ମରନ୍ ॥ ୧୧॥
ନାମତ୍ରୟମିଦଂ ଜପ୍ତ୍ୱା ସ ଯାତି ପରମାଂ ଶ୍ରିୟମ୍ ।
ଯଃ ପଠେତ୍ସ ଚ ଧର୍ମାତ୍ମା ସର୍ୱାନ୍କାମାନବାପ୍ନୁୟାତ୍ ॥ ୧୨॥
॥ ଇତି ଶ୍ରୀବ୍ରହ୍ମପୁରାଣେ ଇନ୍ଦ୍ରୋପଦିଷ୍ଟଂ ମହାଲକ୍ଷ୍ମୀକବଚଂ ସମ୍ପୂର୍ଣମ୍ ॥
.
Comments
Post a Comment