ଶ୍ରୀକମଲାମ୍ବିକାସ୍ତବଃ ଅଥବା ଶ୍ରୀକମଲାମ୍ବିକାଷ୍ଟକମ୍

କମଲାଲୟତଟଶୋଭିତବିମଲାଲୟବିଲସତ୍

କମଲାପତି-କମଲାସନ-କମଲାର୍ଚିତବିଭବମ୍ ।

କମଲାଙ୍ଘ୍ରିକ-କମଲାନନ-କମଲାମ୍ବିକ-ବିଲସତ୍

କମଲାଭିଧମହମାନ୍ତରକମଲେ ମମ କଲୟେ ॥ ୧॥

ଯଜନପର-ମନୁଜବର-ଶିବବଦନଜାର୍ଚିତାଂ

ଭଜନପର-ସନକମୁଖ-ମୁନିହୃଦୟସଂସ୍ଥିତାମ୍ ।

ଅଜଜନକ-ହୟବଦନ-ହରିହୟସୁପୂଜିତାଂ

ଭଜ ହୃଦୟ ରବିଜଲଜ ଗୁରୁବରଦଶାଙ୍କରୀମ୍ ॥ ୨॥

ଈଶାନକୋଣେ କମଲାଲୟସ୍ୟ ଶ୍ରୀତ୍ୟାଗରାଜସ୍ୟ ତୁ ବାୟୁକୋଣେ ।

ଈଶାନଦୃଷ୍ଟିଃ କମଲାମ୍ବିକାୟାଃ ଯା ଭାତି ସା ଶ୍ରୀରମୃତା ସତାଂ ହି ॥ ୩॥

ମଦମ୍ବିକା ହୃତ୍କମଲାନ୍ତରସ୍ଥା ଚିଦମ୍ବିକା ଶ୍ରୀକମଲାଲୟସ୍ଥା ।

ଅନନ୍ତସୌଖ୍ୟଂ କମଲାସନସ୍ଥା ତନୋତୁ ଦେବୀ କମଲାମ୍ବିକା ମେ ॥ ୪॥

ଅନିନ୍ଧନଂ ସମେଧିତେ ନିରନ୍ତରଂ ହୃଦନ୍ତରେ

ଚିଦାଶୁଶୁକ୍ଷଣୌ ମହାବିମୋହରାତ୍ରିନାଶକେ ।

ଅବାଚ୍ୟବୈଭବେ ପରେ ବିଚିତ୍ରମାବିକାସିତେ

ଜୁହୋମ୍ୟହଂ ଧରାଦିମଂ ଶିବାନ୍ତତତ୍ତ୍ୱମମ୍ବିକେ ॥ ୫॥

ଅକ୍ଷରତ୍ରୟରୂପିଣୀମଖିଲାକ୍ଷବୃତ୍ତିବିନାଶିନୀଂ

ଋକ୍ଷରାଜସୁଭାବିତାମମୃତାକ୍ଷରାଙ୍ଘ୍ରିୟୁଗାଂ ଭଜେ ।

ଅକ୍ଷରାସନସଂସ୍ଥିତାମଜଶିକ୍ଷକେଭମୁଖପ୍ରିୟାଂ

ଚିକ୍ଷୁରାଦିବିନାଶିନୀଂ ବରଲକ୍ଷଣାଂ କମଲାମ୍ବିକାମ୍ ॥ ୬॥

ମକାରବର୍ଜଂ ତବ ବାମନେତ୍ରବିନ୍ଦ୍ୱାଢ୍ୟମାଦ୍ୟେ କମଲେତି ନାମ ।

ଶ୍ରୀକାମରଜାଖ୍ୟବରାର୍ଣରୂପଂ ଭଜନ୍ତି ସାଧ୍ୟାଃ ସ୍ୱକବୋଧସିଦ୍ଧୟେ ॥ ୭॥ ସାନ୍ୟାଃ?

ସ୍ୱରେଶ ଚନ୍ଦ୍ରାହ୍ୱୟଶୀତବୀଜତ୍ରୟାଢ୍ୟମାଧେ କମଲେତି ନାମ ।

ମକାରବର୍ଜଂ ତବ ମୂଲବିଦ୍ୟାଂ ବିଦ୍ୟୋତୟତ୍ୟେବ ଗୁରୁସ୍ୱରୂପେ ॥ ୮॥

ଶାନ୍ତସ୍ୱରୂପା ବିମଲପ୍ରକାଶା ତ୍ୱମାତ୍ମରୂପା ଚ ଗୁହାନ୍ତରସ୍ଥା ।

ମାତଶ୍ଚିଦାନନ୍ଦତନୁର୍ୱିଭାସି ତ୍ୱମମ୍ବିକେଽନନ୍ତସୁଖପ୍ରଦାତ୍ରି ॥ ୯॥

ଅନନ୍ତସୂତ୍ରଗ୍ରଥିତା ସୁବର୍ଣମାଲାତିମାଧୁର୍ୟବଚସ୍ସୁମାଢ୍ୟା ।

ଗୁରୁସ୍ୱରୂପା କମଲାମ୍ବିକା ଯା ତଦଙ୍ଘ୍ରିପଦ୍ମଂ ସମଲଙ୍କରୋତୁ ॥

॥ ଇତି ଶ୍ରୀମଚ୍ଚିଦାନନ୍ଦନାଥାଖ୍ୟ ସଦ୍ଗୁରୁପାଦାବ୍ଜାମୃତପାୟିନା

ଅନନ୍ତାନନ୍ଦନାଥେନ ରଚିତଃ ଶ୍ରୀକମଲାମ୍ବିକାସ୍ତବଃ ସମ୍ପୂର୍ଣଃ ॥

ଲକ୍ଷ୍ମୀ ଉପାସନା