ଶ୍ରୀମହାଲକ୍ଷ୍ମୀସ୍ତୋତ୍ରମ୍ ବିଷ୍ଣୁପୁରାଣାନ୍ତର୍ଗତମ୍
ଶ୍ରୀମହାଲକ୍ଷ୍ମୀସ୍ତୋତ୍ରମ୍ ବିଷ୍ଣୁପୁରାଣାନ୍ତର୍ଗତମ୍
ଶ୍ରୀଗଣେଶାୟ ନମଃ ।
ଶ୍ରୀପରାଶର ଉବାଚ
ସିଂହାସନଗତଃ ଶକ୍ରସ୍ସମ୍ପ୍ରାପ୍ୟ ତ୍ରିଦିବଂ ପୁନଃ ।
ଦେବରାଜ୍ୟେ ସ୍ଥିତୋ ଦେବୀଂ ତୁଷ୍ଟାବାବ୍ଜକରାଂ ତତଃ ॥ ୧॥
ଇନ୍ଦ୍ର ଉବାଚ
ନମସ୍ୟେ ସର୍ୱଲୋକାନାଂ ଜନନୀମବ୍ଜସମ୍ଭବାମ୍ । var ସର୍ୱଭୂତାନାଂ
ଶ୍ରିୟମୁନ୍ନିଦ୍ରପଦ୍ମାକ୍ଷୀଂ ବିଷ୍ଣୁବକ୍ଷଃସ୍ଥଲସ୍ଥିତାମ୍ ॥ ୨॥
ପଦ୍ମାଲୟାଂ ପଦ୍ମକରାଂ ପଦ୍ମପତ୍ରନିଭେକ୍ଷଣାମ୍
ବନ୍ଦେ ପଦ୍ମମୁଖୀଂ ଦେବୀଂ ପଦ୍ମନାଭପ୍ରିୟାମହମ୍ ॥ ୩॥
ତ୍ୱଂ ସିଦ୍ଧିସ୍ତ୍ୱଂ ସ୍ୱଧା ସ୍ୱାହା ସୁଧା ତ୍ୱଂ ଲୋକପାବନୀ ।
ସନ୍ଧ୍ୟା ରାତ୍ରିଃ ପ୍ରଭା ଭୂତିର୍ମେଧା ଶ୍ରଦ୍ଧା ସରସ୍ୱତୀ ॥ ୪॥
ଯଜ୍ଞବିଦ୍ୟା ମହାବିଦ୍ୟା ଗୁହ୍ୟବିଦ୍ୟା ଚ ଶୋଭନେ ।
ଆତ୍ମବିଦ୍ୟା ଚ ଦେବି ତ୍ୱଂ ବିମୁକ୍ତିଫଲଦାୟିନୀ ॥ ୫॥
ଆନ୍ୱୀକ୍ଷିକୀ ତ୍ରୟୀ ବାର୍ତା ଦଣ୍ଡନୀତିସ୍ତ୍ୱମେବ ଚ ।
ସୌମ୍ୟାସୌମ୍ୟୈର୍ଜଗଦ୍ରୂପୈସ୍ତ୍ୱୟୈତଦ୍ଦେବି ପୂରିତମ୍ ॥ ୬॥
କା ତ୍ୱନ୍ୟା ତ୍ୱାମୃତେ ଦେବି ସର୍ୱୟଜ୍ଞମୟଂ ବପୁଃ ।
ଅଧ୍ୟାସ୍ତେ ଦେବଦେବସ୍ୟ ଯୋଗଚିନ୍ତ୍ୟଂ ଗଦାଭୃତଃ ॥ ୭॥
ତ୍ୱୟା ଦେବି ପରିତ୍ୟକ୍ତଂ ସକଲଂ ଭୁବନତ୍ରୟମ୍ ।
ବିନଷ୍ଟପ୍ରାୟମଭବତ୍ତ୍ୱୟେଦାନୀଂ ସମେଧିତମ୍ ॥ ୮॥
ଦାରାଃ ପୁତ୍ରାସ୍ତଥାଽଽଗାରସୁହୃଦ୍ଧାନ୍ୟଧନାଦିକମ୍ ।
ଭବତ୍ୟେତନ୍ମହାଭାଗେ ନିତ୍ୟଂ ତ୍ୱଦ୍ୱୀକ୍ଷଣାନ୍ନୃଣାମ୍ ॥ ୯॥
ଶରୀରାରୋଗ୍ୟମୈଶ୍ୱର୍ୟମରିପକ୍ଷକ୍ଷୟଃ ସୁଖମ୍ ।
ଦେବି ତ୍ୱଦ୍ଦୃଷ୍ଟିଦୃଷ୍ଟାନାଂ ପୁରୁଷାଣାଂ ନ ଦୁର୍ଲଭମ୍ ॥ ୧୦॥
ତ୍ୱମମ୍ବା ସର୍ୱଭୂତାନାଂ ଦେବଦେବୋ ହରିଃ ପିତା । var ତ୍ୱଂ ମାତା ସର୍ୱଲୋକାନାଂ
ତ୍ୱୟୈତଦ୍ୱିଷ୍ଣୁନା ଚାମ୍ବ ଜଗଦ୍ୱ୍ୟାପ୍ତଂ ଚରାଚରମ୍ ॥ ୧୧॥
ମା ନଃ କୋଶସ୍ତଥା ଗୋଷ୍ଠଂ ମା ଗୃହଂ ମା ପରିଚ୍ଛଦମ୍ ।
ମା ଶରୀରଂ କଲତ୍ରଂ ଚ ତ୍ୟଜେଥାଃ ସର୍ୱପାବନି ॥ ୧୨॥
ମା ପୁତ୍ରାନ୍ମା ସୁହୃଦ୍ୱର୍ଗାନ୍ମା ପଶୂନ୍ମା ବିଭୂଷଣମ୍ ।
ତ୍ୟଜେଥା ମମ ଦେବସ୍ୟ ବିଷ୍ଣୋର୍ୱକ୍ଷଃସ୍ଥଲାଶ୍ରୟେ ॥ ୧୩॥
ସତ୍ତ୍ୱେନ ସତ୍ୟଶୌଚାଭ୍ୟାଂ ତଥା ଶୀଲାଦିଭିର୍ଗୁଣୈଃ ।
ତ୍ୟଜ୍ୟନ୍ତେ ତେ ନରାଃ ସଦ୍ୟଃ ସନ୍ତ୍ୟକ୍ତା ଯେ ତ୍ୱୟାଽମଲେ ॥ ୧୪॥
ତ୍ୱୟାଽବଲୋକିତାଃ ସଦ୍ୟଃ ଶୀଲାଦ୍ୟୈରଖିଲୈର୍ଗୁଣୈଃ ।
କୁଲୈଶ୍ୱର୍ୟୈଶ୍ଚ ପୂଜ୍ୟନ୍ତେ ପୁରୁଷା ନିର୍ଗୁଣା ଅପି ॥ ୧୫॥
ସ ଶ୍ଲାଘ୍ୟଃ ସ ଗୁଣୀ ଧନ୍ୟଃ ସ କୁଲୀନଃ ସ ବୁଦ୍ଧିମାନ୍ ।
ସ ଶୂରଃ ସ ଚ ବିକ୍ରାନ୍ତୋ ଯସ୍ତ୍ୱୟା ଦେବି ବୀକ୍ଷିତଃ ॥ ୧୬॥
ସଦ୍ୟୋ ବୈଗୁଣ୍ୟମାୟାନ୍ତି ଶୀଲାଦ୍ୟାଃ ସକଲା ଗୁଣାଃ ।
ପରାଙ୍ଗମୁଖୀ ଜଗଦ୍ଧାତ୍ରୀ ଯସ୍ୟ ତ୍ୱଂ ବିଷ୍ଣୁବଲ୍ଲଭେ ॥ ୧୭॥
ନ ତେ ବର୍ଣୟିତୁଂ ଶକ୍ତା ଗୁଣାଞ୍ଜିହ୍ୱାଽପି ବେଧସଃ ।
ପ୍ରସୀଦ ଦେବି ପଦ୍ମାକ୍ଷି ମାଽସ୍ମାଂସ୍ତ୍ୟାକ୍ଷୀଃ କଦାଚନ ॥ ୧୮॥
ଶ୍ରୀପରାଶର ଉବାଚ
ଏବଂ ଶ୍ରୀଃ ସଂସ୍ତୁତା ସମ୍ୟକ୍ ପ୍ରାହ ହୃଷ୍ଟା ଶତକ୍ରତୁମ୍ ।
ଶୃଣ୍ୱତାଂ ସର୍ୱଦେବାନାଂ ସର୍ୱଭୂତସ୍ଥିତା ଦ୍ୱିଜ ॥ ୧୯॥
ଶ୍ରୀରୁବାଚ
ପରିତୁଷ୍ଟାସ୍ମି ଦେବେଶ ସ୍ତୋତ୍ରେଣାନେନ ତେ ହରେ ।
ବରଂ ବୃଣୀଷ୍ୱ ଯସ୍ତ୍ୱିଷ୍ଟୋ ବରଦାଽହଂ ତବାଗତା ॥ ୨୦॥
ଇନ୍ଦ୍ର ଉବାଚ
ବରଦା ଯଦିମେଦେବି ବରାର୍ହୋ ଯଦି ବାଽପ୍ୟହମ୍ ।
ତ୍ରୈଲୋକ୍ୟଂ ନ ତ୍ୱୟା ତ୍ୟାଜ୍ୟମେଷ ମେଽସ୍ତୁ ବରଃ ପରଃ ॥ ୨୧॥
ସ୍ତୋତ୍ରେଣ ଯସ୍ତଥୈତେନ ତ୍ୱାଂ ସ୍ତୋଷ୍ୟତ୍ୟବ୍ଧିସମ୍ଭବେ ।
ସ ତ୍ୱୟା ନ ପରିତ୍ୟାଜ୍ୟୋ ଦ୍ୱିତୀୟୋଽସ୍ତୁ ବରୋ ମମ ॥ ୨୨॥
ଶ୍ରୀରୁବାଚ
ତ୍ରୈଲୋକ୍ୟଂ ତ୍ରିଦଶଶ୍ରେଷ୍ଠ ନ ସନ୍ତ୍ୟକ୍ଷ୍ୟାମି ବାସବ ।
ଦତ୍ତୋ ବରୋ ମୟାଽୟଂ ତେ ସ୍ତୋତ୍ରାରାଧନତୁଷ୍ଟୟା ॥ ୨୩॥
ଯଶ୍ଚ ସାୟଂ ତଥା ପ୍ରାତଃ ସ୍ତୋତ୍ରେଣାନେନ ମାନବଃ ।
ସ୍ତୋଷ୍ୟତେ ଚେନ୍ନ ତସ୍ୟାହଂ ଭବିଷ୍ୟାମି ପରାଙ୍ଗ୍ମୁଖୀ ॥ ୨୪॥
ଶ୍ରୀପାରାଶର ଉବାଚ
ଏବଂ ବରଂ ଦଦୌ ଦେବୀ ଦେବରାଜାୟ ବୈ ପୁରା ।
ମୈତ୍ରେୟ ଶ୍ରୀର୍ମହାଭାଗା ସ୍ତୋତ୍ରାରାଧନତୋଷିତା ॥ ୨୫॥
ଭୃଗୋଃ ଖ୍ୟାତ୍ୟାଂ ସମୁତ୍ପନ୍ନା ଶ୍ରୀଃ ପୂର୍ୱମୁଦଧେଃ ପୁନଃ ।
ଦେବଦାନବୟତ୍ନେନ ପ୍ରସୂତାଽମୃତମନ୍ଥନେ ॥ ୨୬॥
ଏବଂ ଯଦା ଜଗତ୍ସ୍ୱାମୀ ଦେବରାଜୋ ଜନାର୍ଦନଃ ।
ଅବତାରଃ କରୋତ୍ୟେଷା ତଦା ଶ୍ରୀସ୍ତତ୍ସହାୟିନୀ ॥ ୨୭॥
ପୁନଶ୍ଚପଦ୍ମା ସମ୍ଭୂତା ଯଦାଽଦିତ୍ୟୋଽଭବଦ୍ଧରିଃ ।
ଯଦା ଚ ଭାର୍ଗବୋ ରାମସ୍ତଦାଭୂଦ୍ଧରଣୀତ୍ୱିୟମ୍ ॥ ୨୮॥
ରାଘବତ୍ୱେଽଭବତ୍ସୀତା ରୁକ୍ମିଣୀ କୃଷ୍ଣଜନ୍ମନି ।
ଅନ୍ୟେଷୁ ଚାବତାରେଷୁ ବିଷ୍ଣୋରେଖାଽନପାୟିନୀ ॥ ୨୯॥
ଦେବତ୍ୱେ ଦେବଦେହେୟଂ ମାନୁଷତ୍ୱେ ଚ ମାନୁଷୀ ।
ବିଷ୍ଣୋର୍ଦେହାନୁରୁପାଂ ବୈ କରୋତ୍ୟେଷାଽଽତ୍ମନସ୍ତନୁମ୍ ॥ ୩୦॥
ଯଶ୍ଚୈତଶୃଣୁୟାଜ୍ଜନ୍ମ ଲକ୍ଷ୍ମ୍ୟା ଯଶ୍ଚ ପଠେନ୍ନରଃ ।
ଶ୍ରିୟୋ ନ ବିଚ୍ୟୁତିସ୍ତସ୍ୟ ଗୃହେ ଯାବତ୍କୁଲତ୍ରୟମ୍ ॥ ୩୧॥
ପଠ୍ୟତେ ଯେଷୁ ଚୈବର୍ଷେ ଗୃହେଷୁ ଶ୍ରୀସ୍ତବଂ ମୁନେ ।
ଅଲକ୍ଷ୍ମୀଃ କଲହାଧାରା ନ ତେଷ୍ୱାସ୍ତେ କଦାଚନ ॥ ୩୨॥
ଏତତ୍ତେ କଥିତଂ ବ୍ରହ୍ମନ୍ୟନ୍ମାଂ ତ୍ୱଂ ପରିପୃଚ୍ଛସି ।
କ୍ଷୀରାବ୍ଧୌ ଶ୍ରୀର୍ୟଥା ଜାତା ପୂର୍ୱଂ ଭୃଗୁସୁତା ସତୀ ॥ ୩୩॥
ଇତି ସକଲବିଭୂତ୍ୟବାପ୍ତିହେତୁଃ ସ୍ତୁତିରିୟମିନ୍ଦ୍ରମୁଖୋଦ୍ଗତା ହି ଲକ୍ଷ୍ମ୍ୟାଃ ।
ଅନୁଦିନମିହ ପଠ୍ୟତେ ନୃଭିର୍ୟୈର୍ୱସତି ନ ତେଷୁ କଦାଚିଦପ୍ୟଲକ୍ଷ୍ମୀଃ ॥ ୩୪॥
॥ ଇତି ଶ୍ରୀବିଷ୍ଣୁପୁରାଣେ ମହାଲକ୍ଷ୍ମୀ ସ୍ତୋତ୍ରଂ ସମ୍ପୂର୍ଣମ୍ ॥
.
Comments
Post a Comment