ଶ୍ରୀଧନଲକ୍ଷ୍ମୀସ୍ତୋତ୍ରମ୍
ଶ୍ରୀଧନଲକ୍ଷ୍ମୀସ୍ତୋତ୍ରମ୍
ଶ୍ରୀଧନଦା ଉବାଚ-
ଦେବୀ ଦେବମୁପାଗମ୍ୟ ନୀଲକଣ୍ଠଂ ମମ ପ୍ରିୟମ୍ ।
କୃପୟା ପାର୍ୱତୀ ପ୍ରାହ ଶଙ୍କରଂ କରୁଣାକରମ୍ ॥ ୧॥
ଶ୍ରୀଦେବ୍ୟୁବାଚ-
ବ୍ରୂହି ବଲ୍ଲଭ ସାଧୂନାଂ ଦରିଦ୍ରାଣାଂ କୁଟୁମ୍ବିନାମ୍ ।
ଦରିଦ୍ର-ଦଲନୋପାୟମଞ୍ଜସୈବ ଧନପ୍ରଦମ୍ ॥ ୨॥
ଶ୍ରୀଶିବ ଉବାଚ-
ପୂଜୟନ୍ ପାର୍ୱତୀବାକ୍ୟମିଦମାହ ମହେଶ୍ୱରଃ ।
ଉଚିତଂ ଜଗଦମ୍ବାସି ତବ ଭୂତାନୁକମ୍ପୟା ॥ ୩॥
ସସୀତଂ ସାନୁଜଂ ରାମଂ ସାଞ୍ଜନେୟଂ ସହାନୁଗମ୍ ।
ପ୍ରଣମ୍ୟ ପରମାନନ୍ଦଂ ବକ୍ଷ୍ୟେଽହଂ ସ୍ତୋତ୍ରମୁତ୍ତମମ୍ ॥ ୪॥
ଧନଦଂ ଶ୍ରଦ୍ଦଧାନାନାଂ ସଦ୍ୟଃ ସୁଲଭକାରକମ୍ ।
ଯୋଗକ୍ଷେମକରଂ ସତ୍ୟଂ ସତ୍ୟମେବ ବଚୋ ମମ ॥ ୫॥
ପଠନ୍ତଃ ପାଠୟନ୍ତୋଽପି ବ୍ରାହ୍ମଣୈରାସ୍ତିକୋତ୍ତମୈଃ ।
ଧନଲାଭୋ ଭବେଦାଶୁ ନାଶମେତି ଦରିଦ୍ରତା ॥ ୬॥
ଭୂଭବାଂଶଭବାଂ ଭୂତ୍ୟୈ ଭକ୍ତିକଲ୍ପଲତାଂ ଶୁଭାମ୍ ।
ପ୍ରାର୍ଥୟେତ୍ତାଂ ଯଥାକାମଂ କାମଧେନୁସ୍ୱରୂପିଣୀମ୍ ॥ ୭॥
ଧର୍ମଦେ ଧନଦେ ଦେବି ଦାନଶୀଲେ ଦୟାକରେ ।
ତ୍ୱଂ ପ୍ରସୀଦ ମହେଶାନି! ଯଦର୍ଥଂ ପ୍ରାର୍ଥୟାମ୍ୟହମ୍ ॥ ୮॥
ଧରାମରପ୍ରିୟେ ପୁଣ୍ୟେ ଧନ୍ୟେ ଧନଦପୂଜିତେ ।
ସୁଧନଂ ଧାର୍ମିକଂ ଦେହି ଯଜମାନାୟ ସତ୍ୱରମ୍ ॥ ୯॥ var ଯଜନାୟ ସୁସତ୍ୱରମ୍
ରମ୍ୟେ ରୁଦ୍ରପ୍ରିୟେ ରୂପେ ରାମରୂପେ ରତିପ୍ରିୟେ ।
ଶିଖୀସଖମନୋମୂର୍ତ୍ତେ ପ୍ରସୀଦ ପ୍ରଣତେ ମୟି ॥ ୧୦॥ var ଶଶିପ୍ରଭମନୋମୂର୍ତେ
ଆରକ୍ତ-ଚରଣାମ୍ଭୋଜେ ସିଦ୍ଧି-ସର୍ୱାର୍ଥଦାୟିକେ । var ସିଦ୍ଧସର୍ୱାଙ୍ଗଭୂଷିତେ
ଦିବ୍ୟାମ୍ବରଧରେ ଦିବ୍ୟେ ଦିବ୍ୟମାଲ୍ୟୋପଶୋଭିତେ ॥ ୧୧॥
ସମସ୍ତଗୁଣସମ୍ପନ୍ନେ ସର୍ୱଲକ୍ଷଣଲକ୍ଷିତେ ।
(ଅଧିକପାଠ. ଜାତରୂପମଣୀନ୍ଦ୍ୱାଦି-ଭୂଷିତେ ଭୂମିଭୂଷିତେ ।)
ଶରଚ୍ଚନ୍ଦ୍ରମୁଖେ ନୀଲେ ନୀଲ-ନୀରଜ-ଲୋଚନେ ॥ ୧୨॥
ଚଞ୍ଚରୀକଚମୂ-ଚାରୁ-ଶ୍ରୀହାର-କୁଟିଲାଲକେ ।
ମତ୍ତେ ଭଗବତି ମାତଃ କଲକଣ୍ଠରବାମୃତେ ॥ ୧୩॥ var ମୁଖାମୃତେ
ହାସାବଲୋକନୈର୍ଦିବ୍ୟୈର୍ଭକ୍ତଚିନ୍ତାପହାରିକେ ।
ରୂପ-ଲାବଣ୍ୟ-ତାରୂଣ୍ୟ-କାରୂଣ୍ୟ-ଗୁଣଭାଜନେ ॥ ୧୪॥
କ୍ୱଣତ୍କଙ୍କଣମଞ୍ଜୀରେ ଲସଲ୍ଲୀଲାକରାମ୍ବୁଜେ ।
ରୁଦ୍ରପ୍ରକାଶିତେ ତତ୍ତ୍ୱେ ଧର୍ମାଧାରେ ଧରାଲୟେ ॥ ୧୫॥
ପ୍ରୟଚ୍ଛ ଯଜମାନାୟ ଧନଂ ଧର୍ମୈକସାଧନମ୍ ।
ମାତସ୍ତ୍ୱଂ ମେଽବିଲମ୍ବେନ ଦିଶସ୍ୱ ଜଗଦମ୍ବିକେ ॥ ୧୬॥ var ମାତର୍ମେ ମାବି
କୃପୟା କରୁଣାଗାରେ ପ୍ରାର୍ଥିତଂ କୁରୁ ମେ ଶୁଭେ ।
ବସୁଧେ ବସୁଧାରୂପେ ବସୁ-ବାସବ-ବନ୍ଦିତେ ॥ ୧୭॥
ଧନଦେ ଯଜମାନାୟ ବରଦେ ବରଦା ଭବ । var ଯଜନାୟୈବ
ବ୍ରହ୍ମଣ୍ୟୈର୍ବ୍ରାହ୍ମଣୈଃ ପୂଜ୍ୟେ ପାର୍ୱତୀଶିବଶଙ୍କରେ ॥ ୧୮॥ var ବ୍ରହ୍ମଣ୍ୟେ ବ୍ରାହ୍ମଣେ
ସ୍ତୋତ୍ରଂ ଦରିଦ୍ରତାବ୍ୟାଧିଶମନଂ ସୁଧନପ୍ରଦମ୍ ।
ଶ୍ରୀକରେ ଶଙ୍କରେ ଶ୍ରୀଦେ ପ୍ରସୀଦ ମୟି କିଙ୍କରେ ॥ ୧୯॥
ପାର୍ୱତୀଶପ୍ରସାଦେନ ସୁରେଶ-କିଙ୍କରେରିତମ୍ ।
ଶ୍ରଦ୍ଧୟା ଯେ ପଠିଷ୍ୟନ୍ତି ପାଠୟିଷ୍ୟନ୍ତି ଭକ୍ତିତଃ ॥ ୨୦॥
ସହସ୍ରମୟୁତଂ ଲକ୍ଷଂ ଧନଲାଭୋ ଭବେଦ୍ ଧ୍ରୁବମ୍ ।
ଧନଦାୟ ନମସ୍ତୁଭ୍ୟଂ ନିଧିପଦ୍ମାଧିପାୟ ଚ ।
ଭବନ୍ତୁ ତ୍ୱତ୍ପ୍ରସାଦାନ୍ମେ ଧନ-ଧାନ୍ୟାଦିସମ୍ପଦଃ ॥ ୨୧॥
॥ ଇତି ଶ୍ରୀଧନଲକ୍ଷ୍ମୀସ୍ତୋତ୍ରଂ ଅଥବା ଧନେଶ୍ୱରୀ ସମ୍ପୂର୍ଣମ୍ ॥
.
Comments
Post a Comment