ଶ୍ରୀଲକ୍ଷ୍ମୀଲହରୀ
ଶ୍ରୀଲକ୍ଷ୍ମୀଲହରୀ
ଶ୍ରୀଗଣେଶାୟ ନମଃ ।
ସମୁନ୍ମୀଲନ୍ନୀଲାମ୍ବୁଜନିକରନୀରାଜିତରୁଚାମ୍-
ଅପାଙ୍ଗାନାଂ ଭଙ୍ଗୈରମୃତଲହରୀଶ୍ରେଣିମସୃଣୈଃ ।
ହ୍ରିୟା ହୀନଂ ଦୀନଂ ଭୃଶମୁଦରଲୀନଂ କରୁଣୟା
ହରିଶ୍ୟାମା ସା ମାମବତୁ ଜଡସାମାଜିକମପି ॥ ୧॥
ସମୁନ୍ମୀଲତ୍ୱନ୍ତଃକରଣକରୁଣୋଦ୍ଗାରଚତୁରଃ
କରିପ୍ରାଣତ୍ରାଣପ୍ରଣୟିନି ଦୃଗନ୍ତସ୍ତବ ମୟି ।
ଯମାସାଦ୍ୟୋନ୍ମାଦ୍ୟଦ୍ଦ୍ୱିପନିୟୁତଗଣ୍ଡସ୍ଥଲଗଲନ୍-
ମଦକ୍ଲିନ୍ନଦ୍ୱାରୋ ଭବତି ସୁଖସାରୋ ନରପତିଃ ॥ ୨॥
ଉରସ୍ୟସ୍ୟ ଭ୍ରଶ୍ୟତ୍କବରଭରନିର୍ୟତ୍ସୁମନସଃ
ପତନ୍ତି ସ୍ୱର୍ବାଲାଃ ସ୍ମରଶରପରାଧୀନମନସଃ ।
ସୁରାସ୍ତଂ ଗାୟନ୍ତି ସ୍ଫୁରିତତନୁଗଙ୍ଗାଧରମୁଖାସ୍-
ତବାୟଂ ଦୃକ୍ପାତୋ ଯଦୁପରି କୃପାତୋ ବିଲସତି ॥ ୩॥
ସମୀପେ ସଙ୍ଗୀତସ୍ୱରମଧୁରଭଙ୍ଗୀ ମୃଗଦୃଶାଂ
ବିଦୂରେ ଦାନାନ୍ଧଦ୍ୱିରଦକଲଭୋଦ୍ଦାମନିନଦଃ ।
ବହିର୍ଦ୍ୱାରେ ତେଷାଂ ଭବତି ହୟହେଷାକଲକଲୋ
ଦୃଗେଷା ତେ ଯେଷାମୁପରି କମଲେ ଦେବି ସଦୟା ॥ ୪॥
ଅଗଣ୍ୟୈରିନ୍ଦ୍ରାଦ୍ୟୈରପି ପରମପୁଣ୍ୟୈଃ ପରିଚିତୋ
ଜଗଜ୍ଜନ୍ମସ୍ଥାନପ୍ରଲୟରଚନାଶିଲ୍ପନିପୁଣଃ ।
ଉଦଞ୍ଚତ୍ପୀୟୂଷାମ୍ବୁଧିଲହରିଲୀଲାମନୁହରନ୍-
ନପାଙ୍ଗସ୍ତେଽମନ୍ଦଂ ମମ କଲୁଷବୃନ୍ଦଂ ଦଲୟତୁ ॥ ୫॥
ନମନ୍ମୌଲିଶ୍ରେଣିତ୍ରିପୁରପରିପନ୍ଥିପ୍ରତିଲସତ୍-
କପର୍ଦବ୍ୟାବୃତ୍ତିସ୍ଫୁରିତଫଣିଫୂତ୍କାରଚକିତଃ ।
ଲସତ୍ଫୁଲ୍ଲାମ୍ଭୋଜମ୍ରଦିମହରଣଃ କୋଽପି ଚରଣଶ୍-
ଚିରଂ ଚେତଶ୍ଚାରୀ ମମ ଭବତୁ ବାରୀଶଦୁହିତୁଃ ॥ ୬॥
ପ୍ରବାଲାନାଂ ଦୀକ୍ଷାଗୁରୁରପି ଚ ଲାକ୍ଷାରୁଣରୁଚାଂ
ନିୟନ୍ତ୍ରୀ ବନ୍ଧୂକଦ୍ୟୁତିନିକରବନ୍ଧୂକୃତିପଟୁଃ ।
ନୃଣାମନ୍ତର୍ଧ୍ୱାନ୍ତଂ ନିବିଡମପହର୍ତୁଂ ତବ କିଲ
ପ୍ରଭାତଶ୍ରୀରେଷା ଚରଣରୁଚିବେଷା ବିଜୟତେ ॥ ୭॥
ପ୍ରଭାତପ୍ରୋନ୍ମୀଲତ୍କମଲବନସଞ୍ଚାରସମୟେ
ଶିଖାଃ କିଞ୍ଜଲ୍କାନାଂ ବିଦଧତି ରୁଜଂ ଯତ୍ର ମୃଦୁଲାଃ ।
ତଦେତନ୍ମାତସ୍ତେ ଚରଣମରୁଣଶ୍ଲାଘ୍ୟକରୁଣଂ
କଠୋରା ମଦ୍ୱାଣୀ କଥମିୟମିଦାନୀଂ ପ୍ରବିଶତୁ ॥ ୮॥
ସ୍ମିତଜ୍ୟୋତ୍ସ୍ନାମଜ୍ଜଦ୍ଦ୍ୱିଜମଣିମୟୂଖାମୃତଝରୈର୍-
ନିଷିଞ୍ଚନ୍ତୀଂ ବିଶ୍ୱଂ ତବ ବିମଲମୂର୍ତିଂ ସ୍ମରତି ଯଃ ।
ଅମନ୍ଦଂ ସ୍ୟନ୍ଦନ୍ତେ ବଦନକମଲାଦତ୍ୟ କୃତିନୋ
ବିବିକ୍ତୌ ବୈ କଲ୍ପାଃ ସତତମବିକଲ୍ପା ନବଗିରଃ ॥ ୯॥
ଶରୌ ମାୟାବୀଜୌ ହିମକରକଲାକ୍ରାନ୍ତଶିରସୌ
ବିଧାୟୋର୍ଧ୍ୱଂ ବିନ୍ଦୁଂ ସ୍ଫୁରିତମିତି ବୀଜଂ ଜଲଧିଜେ ।
ଜପେଦ୍ୟଃ ସ୍ୱଚ୍ଛନ୍ଦଂ ସ ହି ପୁନରମନ୍ଦଂ ଗଜଘଟାମ୍-
ଅଦଭ୍ରାମ୍ୟଦ୍ଭୃଙ୍ଗୈର୍ମୁଖରୟତି ବେଶ୍ମାନି ବିଦୁଷାମ୍ ॥ ୧୦॥
ସ୍ମରୋ ନାମଂ ନାମଂ ତ୍ରିଜଗଦଭିରାମଂ ତବ ପଦଂ
ପ୍ରପେଦେ ସିଦ୍ଧିଂ ଯାଂ କଥମିବ ନରସ୍ତାଂ କଥୟତୁ ।
ଯୟା ପାତଂ ପାତଂ ପଦକମଲୟୋଃ ପର୍ୱତଚରୋ
ହରୋ ହା ରୋଷାର୍ଦ୍ରାମନୁନୟତି ଶୈଲେନ୍ଦ୍ରତନୟାମ୍ ॥ ୧୧॥
ହରନ୍ତୋ ନିଃଶଙ୍କଂ ହିମକରକଲାନାଂ ରୁଚିରତାଂ
କିରନ୍ତଃ ସ୍ୱଚ୍ଛନ୍ଦଂ କିରଣମୟପୀୟୂଷନିକରମ୍ ।
ବିଲୁମ୍ପନ୍ତୁ ପ୍ରୌଢା ହରିହୃଦୟହାରାଃ ପ୍ରିୟତମା
ମମାନ୍ତଃସନ୍ତାପଂ ତବ ଚରଣଶୋଣାମ୍ବୁଜନଖାଃ ॥ ୧୨॥
ମିଷାନ୍ମାଣିକ୍ୟାନାଂ ବିଗଲିତନିମେଷଂ ନିମିଷତାମ୍-
ଅମନ୍ଦଂ ସୌନ୍ଦର୍ୟ ତବ ଚରଣୟୋରମ୍ବୁଧିସୁତେ ।
ପଦାଲଙ୍କାରାଣାଂ ଜୟତି କଲନିକ୍ୱାଣନପଟୁର୍-
ଉଦଞ୍ଚନ୍ନୁଦ୍ଦାମଃ ସ୍ତୁତିବଚନଲୀଲାକଲକଲଃ ॥ ୧୩॥
ମଣିଜ୍ୟୋତ୍ସ୍ନାଜାଲୈର୍ନିଜତନୁରୁଚାଂ ମାଂସଲତୟା
ଜଟାଲଂ ତେ ଜଙ୍ଘାୟୁଗଲମଘଭଙ୍ଗାୟ ଭବତୁ ।
ଭ୍ରମନ୍ତୀ ଯନ୍ମଧ୍ୟେ ଦରଦଲିତଶୋଣାମ୍ବୁଜରୁଚାଂ
ଦୃଶାଂ ମାଲା ନୀରାଜନମିବ ବିଧତ୍ତେ ମୁରରିପୋଃ ॥ ୧୪॥
ହରଦ୍ଗର୍ୱଂ ସର୍ୱଂ କରିପତିକରାଣାଂ ମୃଦୁତୟା
ଭୃଶଂ ଭାଭିର୍ଦମ୍ଭଂ କନକମୟରମ୍ଭାବନିରୁହାମ୍ ।
ଲସଜ୍ଜାନୁଜ୍ୟୋତ୍ସ୍ନା ତରଣିପରିଣଦ୍ଧଂ ଜଲଧିଜେ
ତବୋରୁଦ୍ୱନ୍ଦ୍ୱଂ ନଃ ଶ୍ଲଥୟତୁ ଭବୋରୁଜ୍ୱରଭୟମ୍ ॥ ୧୫॥
କଲକ୍ୱାଣାଂ କାଞ୍ଚୀଂ ମଣିଗଣଜଟାଲାମଧିବହନ୍-
ବସାନଃ କୌସୁମ୍ଭଂ ବସନମସନଂ କୌସ୍ତୁଭରୁଚାମ୍ ।
ମୁନିବ୍ରାତୈଃ ପ୍ରାତଃ ଶୁଚିବଚନଜାତୈରତିନୁତଂ
ନିତମ୍ବସ୍ତେ ବିମ୍ବଂ ହସତି ନବମମ୍ବାମ୍ବରମଣେଃ ॥ ୧୬॥
ଜଗନ୍ମିଥ୍ୟାଭୂତଂ ମମ ନିଗଦତାଂ ବେଦବଚସାମ୍-
ଅଭିପ୍ରାୟୋ ନାଦ୍ୟାବଧି ହୃଦୟମଧ୍ୟାବିଶଦୟମ୍ ।
ଇଦାନୀଂ ବିଶ୍ୱେଷାଂ ଜନକମୁଦରଂ ତେ ବିମୃଶତୋ
ବିସନ୍ଦେହଂ ଚେତୋଽଜନି ଗରୁଡକେତୋଃ ପ୍ରିୟତମେ ॥ ୧୭॥
ଅନଲ୍ପୈର୍ୱାଦୀନ୍ଦ୍ରୈରଗଣିତମହାୟୁକ୍ତିନିବହୈର୍-
ନିରସ୍ତା ବିସ୍ତାରଂ କ୍ୱଚିଦକଲୟନ୍ତୀ ତନୁମପି ।
ଅସତ୍ଖ୍ୟାତିବ୍ୟାଖ୍ୟାଧିକଚତୁରିମାଖ୍ୟାତମହିମା
ବଲଗ୍ନେ ଲଗ୍ନେୟଂ ସୁଗତମତସିଦ୍ଧାନ୍ତସରଣିଃ ॥ ୧୮॥
ନିଦାନଂ ଶୃଙ୍ଗାଂରପ୍ରକରମକରନ୍ଦସ୍ୟ କମଲେ
ମହାନେବାଲମ୍ବୋ ହରିନୟନରୋଲମ୍ବବରୟୋଃ ।
ନିଧାନଂ ଶୋଭାନାଂ ନିଧନମନୁତାପସ୍ୟ ଜଗତୋ
ଜବେନାଭୀତିଂ ମେ ଦିଶତୁ ତବ ନାଭୀସରସିଜମ୍ ॥ ୧୯॥
ଗଭୀରାମୁଦ୍ୱେଲାଂ ପ୍ରଥମରସକଲ୍ଲୋଲମିଲିତାଂ
ବିଗାଢୁଂ ତେ ନାଭୀବିମଲସରସୀଂ ଗୌର୍ମମ ମନାକ୍ ।
ପଦଂ ଯାବନ୍ନୟସ୍ୟତ୍ୟହହ ବିନିମଗ୍ନୈବ ସହସା
ନହି କ୍ଷେମଂ ସୂତେ ଗୁରୁମହିମଭୂତେଷ୍ୱବିନୟଃ ॥ ୨୦॥
କୁଚୌ ତେ ଦୁଗ୍ଧାମ୍ଭୋନିଧିକୁଲଶିଖାମଣ୍ଡନମଣେ
ହରେତେ ସୌଭାଗ୍ୟଂ ଯଦି ସୁରଗିରେଶ୍ଚିତ୍ରମିହ କିମ୍ ।
ତ୍ରିଲୋକୀଲାବଣ୍ୟାହରଣନବଲୀଲାନିପୁଣୟୋର୍-
ଯୟୋର୍ଦତ୍ତେ ଭୂୟଃ କରମଖିଲନାଥୋ ମଧୁରିପୁଃ ॥ ୨୧॥
ହରକ୍ରୋଧତ୍ରସ୍ୟନ୍ମଦନନବଦୁର୍ଗଦ୍ୱୟତୁଲାଂ
ଦଧତ୍କୋକଦ୍ୱନ୍ଦ୍ୱଦ୍ୟୁତିଦମନଦୀକ୍ଷାଧିଗୁରୁତାମ୍ ।
ତବୈତଦ୍ୱକ୍ଷୋଜଦ୍ୱିତୟମରବିନ୍ଦାକ୍ଷମହିଲେ
ମମ ସ୍ୱାନ୍ତଧ୍ୱାନ୍ତଂ କିମପି ଚ ନିତାନ୍ତଂ ଗମୟତୁ ॥ ୨୨॥
ଅନେକବ୍ରହ୍ମାଣ୍ଡସ୍ଥିତିନିୟମଲୀଲାବିଲସିତେ
ଦୟାପୀୟୂଷାମ୍ଭୋନିଧିସହଜସମ୍ବାସଭବନେ ।
ବିଧୋଶ୍ଚିତ୍ତାୟାମେ ହୃଦୟକମଲେ ତେ ତୁ କମଲେ
ମନାଙ୍ଗ ମନ୍ନିସ୍ତାରସ୍ମୃତିରପି ଚ କୋଣେ ନିବସତୁ ॥ ୨୩॥
ମୃଣାଲୀନାଂ ଲୀଲାଃ ସହଜଲବଣିମ୍ନା ଲଘୟତାଂ
ଚତୁର୍ଣାଂ ସୌଭାଗ୍ୟଂ ତବ ଜନନି ଦୋଷ୍ଣାଂ ବଦତୁ କଃ ।
ଲୁଠନ୍ତି ସ୍ୱଚ୍ଛନ୍ଦଂ ମରକତଶିଲାମାଂସଲରୁଚଃ
ଶ୍ରୁତୀନାଂ ସ୍ପର୍ଧାଂ ଯେ ଦଧତ ଇବ କଣ୍ଠେ ମଧୁରିପୋଃ ॥ ୨୪॥
ଅଲଭ୍ୟଂ ସୌରଭ୍ୟଂ କବିକୁଲନମସ୍ୟା ରୁଚିରତା
ତଥାପି ତ୍ୱଦ୍ଧସ୍ତେ ନିବସଦରବିନ୍ଦଂ ବିକସିତମ୍ ।
କଲାପେ କାବ୍ୟାନାଂ ପ୍ରକୃତିକମନୀୟସ୍ତୁତିବିଧୌ
ଗୁଣୋତ୍କର୍ଷାଧାନଂ ପ୍ରଥିତମୁପମାନଂ ସମଜନି ॥ ୨୫॥
ଅନଲ୍ପଂ ଜଲ୍ପନ୍ତୁ ପ୍ରତିହତଧିୟଃ ପଲ୍ଲବତୁଲାଂ
ରସଜ୍ଞାମଜ୍ଞାନାଂ କ ଇବ କମଲେ ମନ୍ଥରୟତୁ ।
ତ୍ରପନ୍ତୁ ଶ୍ରୀଭିକ୍ଷାବିତରଣବଶୀଭୂତଜଗତାଂ
କରାଣାଂ ସୌଭାଗ୍ୟଂ ତବ ତୁଲୟିତୁଂ ତୁଙ୍ଗରସନାଃ ॥ ୨୬॥
ସମାହାରଃ ଶ୍ରୀଣାଂ ବିରଚିତବିହାରୋ ହରିଦୃଶାଂ
ପରୀହାରୋ ଭକ୍ତପ୍ରଭବଭବସନ୍ତାପସରଣେଃ ।
ପ୍ରହାରଃ ସର୍ୱାସାମପି ଚ ବିପଦାଂ ବିଷ୍ଣୁଦୟିତେ
ମମୋଦ୍ଧାରୋପାୟଂ ତବ ସପଦି ହାରୋ ବିମୃଶତୁ ॥ ୨୭॥
ଅଲଙ୍କୁର୍ୱାଣାନାଂ ମଣିଗଣଘୃଣୀନାଂ ଲବଣିମା
ଯଦୀୟାଭିର୍ଭାଭିର୍ଭଜତି ମହିମାନଂ ଲଘୁରପି ।
ସୁପର୍ୱଶ୍ରେଣୀନାଂ ଜନିତପରସୌଭାଗ୍ୟବିଭବାସ୍-
ତବାଙ୍ଗୁଲ୍ୟସ୍ତା ମେ ଦଦତୁ ହରିବାମେଽଭିଲଷିତମ୍ ॥ ୨୮॥
ତପସ୍ତେପେ ତୀବ୍ରଂ କିମପି ପରିତପ୍ୟ ପ୍ରତିଦିନଂ
ତବ ଗ୍ରୀବାଲକ୍ଷ୍ମୀଲବପରିଚୟାଦାପ୍ତବିଭବମ୍ ।
ହରିଃ କମ୍ବୁଂ ଚୁମ୍ବତ୍ୟଥ ବହତି ପାଣୌ କିମଧିକଂ
ବଦାମସ୍ତତ୍ରାୟଂ ପ୍ରଣୟବଶତୋଽସ୍ୟୈ ସ୍ପୃହୟତି ॥ ୨୯॥
ଅଭୂଦପ୍ରତ୍ୟୂହଃ ସକଲହରିଦୁଲ୍ଲାସନବିଧିର୍-
ବିଲୀନୋ ଲୋକାନାଂ ସ ହି ନୟନତାପୋଽପି କମଲେ ।
ତବାସ୍ମିନ୍ପୀୟୂଷଂ କିରତି ବଦନେ ରମ୍ୟବଦନେ
କୁତୋ ହେତୋଶ୍ଚେତୋବିଧୁରୟମୁଦେତି ସ୍ମ ଜଲଧେଃ ॥ ୩୦॥
ମୁଖାମ୍ଭୋଜେ ମନ୍ଦସ୍ମିତମଧୁରକାନ୍ତ୍ୟା ବିକସତାଂ
ଦ୍ୱିଜାନାଂ ତେ ହୀରାବଲିବିହିତନୀରାଜନରୁଚାମ୍ ।
ଇୟଂ ଜ୍ୟୋତ୍ସ୍ନା କାପି ସ୍ରବଦମୃତସନ୍ଦୋହସରସା
ମମୋଦ୍ୟଦ୍ଦାରିଦ୍ର୍ୟଜ୍ୱରତରୁଣତାପଂ ତିରୟତୁ ॥ ୩୧॥
କୁଲୈଃ କସ୍ତୂରୀଣାଂ ଭୃଶମନିଶମାଶାସ୍ୟମପି
ଚ ପ୍ରଭାତପ୍ରୋନ୍ମୀଲନ୍ନଲିନନିବହୈରଶ୍ରୁତଚରମ୍ ।
ବହନ୍ତଃ ସୌରଭ୍ୟଂ ମୃଦୁଗତିବିଲାସା ମମ ଶିବଂ
ତବ ଶ୍ୱାସା ନାସାପୁଟବିହିତବାସା ବିଦଧତାମ୍ ॥ ୩୨॥
କପୋଲେ ତେ ଦୋଲାୟିତଲଲିତଲୋଲାଲକବୃତେ
ବିମୁକ୍ତା ଧମ୍ମିଲ୍ଲାଦଭିଲସତି ମୁକ୍ତାବଲିରିୟମ୍ ।
ସ୍ୱକୀୟାନାଂ ବନ୍ଦୀକୃତମସହମାନୈରିବ ବଲାନ୍-
ନିବଧ୍ୟୋର୍ଧ୍ୱଂ କୃଷ୍ଟା ତିମିରନିକୁରମ୍ବୈର୍ୱିଧୁକଲା ॥ ୩୩॥
ପ୍ରସାଦୋ ଯସ୍ୟାୟଂ ନମଦମିତଗୀର୍ୱାଣମୁକୁଟ-
ପ୍ରସର୍ପଜ୍ଜୋତ୍ସ୍ନାଭିଶ୍ଚରଣତଲପୀଠାର୍ଚିତବିଧିଃ ।
ଦୃଗମ୍ଭୋଜଂ ତତ୍ତେ ଗତିହସିତମତ୍ତେଭଗମନେ
ବନେ ଲୀନୈର୍ଦୀନୈଃ କଥୟ କଥମୀୟାଦିହ ତୁଲାମ୍ ॥ ୩୪॥
ଦୁରାପା ଦୁର୍ୱୃତ୍ତୈର୍ଦୁରିତଦମନେ ଦାରଣଭରା
ଦୟାର୍ଦ୍ରା ଦୀନାନାମୁପରି ଦଲଦିନ୍ଦୀବରନିଭା ।
ଦହନ୍ତୀ ଦାରିଦ୍ର୍ୟଦ୍ରୁମକୁଲମୁଦାରଦ୍ରବିଣଦା
ତ୍ୱଦୀୟା ଦୃଷ୍ଟିର୍ମେ ଜନନି ଦୁରଦୃଷ୍ଟଂ ଦଲୟତୁ ॥ ୩୫॥
ତବ ଶ୍ରୋତ୍ରେ ଫୁଲ୍ଲୋତ୍ପଲସକଲସୌଭାଗ୍ୟଜୟିନୀ
ସଦୈବ ଶ୍ରୀନାରାୟଣଗୁଣଗଣୌଘପ୍ରଣୟିନୀ ।
ରବୈର୍ଦୀନାଂ ଲୀନାମନିଶମବଧାନାତିଶୟିନୀ
ମମାପ୍ୟେତାଂ ବାଚଂ ଜଲଧିତନୟେ ଗୋଚରୟତାମ୍ ॥ ୩୬॥
ପ୍ରଭାଜାଲୈଃ ପ୍ରାଭାତିକଦିନକରାଭାପନୟନଂ
ତବେଦଂ ଖେଦଂ ମେ ବିଘଟୟତୁ ତାଟଙ୍କୟୁଗଲମ୍ ।
ମହିମ୍ନା ଯସ୍ୟାୟଂ ପ୍ରଲୟସମୟେଽପି କ୍ରତୁଭୁଜାଂ
ଜଗତ୍ପାୟଂ ପାୟଂ ସ୍ୱପିତି ନିରପାୟଂ ତବ ପତିଃ ॥ ୩୭॥
ନିବାସୋ ମୁକ୍ତାନାଂ ନିବିଡତରନୀଲାମ୍ବୁଦନିଭସ୍-
ତବାୟଂ ଧମ୍ମିଲ୍ଲୋ ବିମଲୟତୁ ମଲ୍ଲୋଚନୟୁଗମ୍ ।
ଭୃଶଂ ଯସ୍ମିନ୍କାଲାଗରୁବହୁଲସୌରଭ୍ୟନିବହୈଃ
ପତନ୍ତି ଶ୍ରୀଭିକ୍ଷାର୍ଥିନ ଇବ ମଦାନ୍ଧା ମଧୁଲିହଃ ॥ ୩୮॥
ବିଲଗ୍ନୌ ତେ ପାର୍ଶ୍ୱଦ୍ୱୟପରିସରେ ମତ୍ତକରିଣୌ
କରୋନ୍ନୀତୈରଞ୍ଚନ୍ମଣିକଲଶମୁଗ୍ଧାସ୍ୟଗଲିତୈଃ ।
ନିଷିଞ୍ଚନ୍ତୌ ମୁକ୍ତାମଣିଗଣଜୟୈସ୍ତ୍ୱାଂ ଜଲକଣୈର୍-
ନମସ୍ୟାମୋ ଦାମୋଦରଗୃହିଣୀ ଦାରିଦ୍ର୍ୟଦଲିତାଃ ॥ ୩୯॥
ଅୟେ ମାତର୍ଲକ୍ଷ୍ମି ତ୍ୱଦରୁଣପଦାମ୍ଭୋଜନିକଟେ
ଲୁଠନ୍ତଂ ବାଲଂ ମାମବିରଲଗଲଦ୍ବାଷ୍ପଜଟିଲମ୍ ।
ସୁଧାସେକସ୍ନିଗ୍ଧୈରତିମସୃଣମୁଗ୍ଧୈଃ କରତଲୈଃ
ସ୍ପୃଶନ୍ତୀ ମା ରୋଦୀରିତି ବଦ ସମାଶ୍ୱାସ୍ୟସି କଦା ॥ ୪୦॥
ରମେ ପଦ୍ମେ ଲକ୍ଷ୍ମି ପ୍ରଣତଜନକଲ୍ପଦ୍ରୁମଲତେ
ସୁଧାମ୍ଭୋଧେଃ ପୁତ୍ରି ତ୍ରିଦଶନିକରୋପାସ୍ତଚରଣେ ।
ପରେ ନିତ୍ୟଂ ମାତର୍ଗୁଣମୟି ପରବ୍ରହ୍ମମହିଲେ
ଜଗନ୍ନାଥସ୍ୟାକର୍ଣୟ ମୃଦୁଲବର୍ଣାବଲିମିମାମ୍ ॥ ୪୧॥
॥ ଇତି ପଣ୍ଡିତରାଜଶ୍ରୀଜଗନ୍ନାଥବିରଚିତା ଲକ୍ଷ୍ମୀଲହରୀ ସମାପ୍ତା ॥
.
Comments
Post a Comment