କମଲାଷ୍ଟକମ୍
କମଲାଷ୍ଟକମ୍
ନ୍ୟଙ୍କାବରାତିଭୟଶଙ୍କାକୁଲେ ଧୃତଦୃଗଙ୍କାୟତିଃ ପ୍ରଣମତାଂ
ଶଙ୍କାକଲଙ୍କୟୁତପଙ୍କାୟତାଶ୍ମଶିତଟଙ୍କାୟିତସ୍ୱଚରିତା ।
ତ୍ୱଂ କାଲଦେଶପଦଶଙ୍କାତିପାତିପତିସଙ୍କାଶ ବୈଭବୟୁତା
ଶଂ କାମମାତରନିଶଂ କାମନୀୟମିହ ସଙ୍କାଶୟାଶୁ କୃପୟା ॥ ୧॥
ଆଚାନ୍ତରଙ୍ଗଦଲିମୋଚାନ୍ତରଙ୍ଗରୁଚିବାଚାଂ ତରଙ୍ଗଗତିଭିଃ
କାଚାଟନାୟ କଟୁବାଚାଟଭାବୟୁତନୀଚାଟନଂ ନ କଲୟେ ।
ବାଚାମଗୋଚରସଦାଚାରସୂରିଜନତାଚାତୁରୀବିବୃତୟେ
ପ୍ରାଚାଂ ଗତିଂ କୁଶଲବାଚାଂ ଜଗଜ୍ଜନନି ଯାଚାମି ଦେବି ଭବତୀମ୍ ॥ ୨॥
ଚେଟୀକୃତାମରବଧୂଟୀକରାଗ୍ରଧୃତପେଟୀପୁଟାର୍ଘ୍ୟସୁମନୋ-
ବୀଟୀଦଲକ୍ରମୁକପାଟୀରପଙ୍କନବଶାଟୀକୃତାଙ୍ଗରଚନା ।
ଖେଟୀକମାନଶତକୋଟୀକରାବ୍ଜଜଜଟାଟୀରବନ୍ଦିତପଦା
ଯା ଟୀକତେଽବ୍ଜବନମାଟୀକତାଂ ହୃଦୟବାଟୀମତୀବ କମଲା ॥ ୩॥
ସ୍ୱାନ୍ତାନ୍ତରାଲକୃତକାନ୍ତାଗମାନ୍ତଶତଶାନ୍ତାନ୍ତରାଘନିକରାଃ
ଶାନ୍ତାର୍ଥକାନ୍ତବକୃତାନ୍ତା ଭଜନ୍ତି ହୃଦି ଦାନ୍ତା ଦୁରନ୍ତତପସା ।
ଯାଂ ତାନତାପଭବତାନ୍ତାତିଭୀତଜଗତାଂ ତାପନୋଦନପଟୁଂ
ମାଂ ତାରୟତ୍ୱଶୁଭକାନ୍ତାରତୋଽଦ୍ୟ ହରିକାନ୍ତାକଟାକ୍ଷଲହରୀ ॥ ୪॥
ଯାଂ ଭାବୁକା ମନସି ସମ୍ଭାବୟନ୍ତି ଭବସମ୍ଭାବନାପହୃତୟେ
ତ୍ୱଂ ଭାସି ଲକ୍ଷ୍ମି ସତତଂ ଭାବ୍ୟଯଦ୍ଭବନସମ୍ଭାବନାଦିବିଧୟେ ।
ଜମ୍ଭାରିସମ୍ପଦୁପଲମ୍ଭାଦିକାରଣମହଂ ଭାବ୍ୟମଙ୍ଘ୍ରିୟୁଗଲଂ
ସମ୍ଭାବୟେ ଶ୍ରୁତିଷୁ ସମ୍ଭାଷିତଂ ବଚସି ସମ୍ଭାଷ୍ୟ ତସ୍ୟ ତବ ଚ ॥ ୫॥
ଦୂରାବଧୂତମଧୁଧାରାଗିରୋଚ୍ଚକୁଚଭାରାନତାଙ୍ଗଲତିକା-
ସାରାଙ୍ଗଲିପ୍ତଘନସାରାର୍ଦ୍ରକୁଙ୍କୁମରସା ରାଜହଂସଗମନା ।
ବୈରାକରସ୍ମରବିକାରାପସଂସରଣବାରାଶିମଗ୍ରମନସଃ
ଶ୍ରୀରାବିରସ୍ତୁ ଧୁରି ତାରାୟ ମେ ଗୁରୁଭିରାରଧିତା ଭଗବତୀ ॥ ୬॥
ଶ୍ରୀବାସଧୂପକନଦାବାସଦୀପରୁଚିରାବାସଭୂପରିସରା
ଶ୍ରୀବାସଦେଶଲସଦାବାପକାଶରଦଭାବାଭକେଶନିକରା ।
ଶ୍ରୀବାସୁଦେବରମଣୀ ବାମଦେବବିଧିଦେବାଧିପାବନପରା
ଶ୍ରୀବାସବସ୍ତୁନରଦେବାହତସ୍ତୁତିସଭାବା ମୁଦେଽସ୍ତୁ ସୁତରାମ୍ ॥ ୭॥
ଭାଷାଦିଦେବକୁଲୟୋଷାମଣିସ୍ତବନଘୋଷାଞ୍ଚିତସ୍ୱସବିଧା
ଦୋଷାକୁଲେ ଜଗତି ପୋଷାକୁଲା ସପଦି ଶେଷାହି ଶାୟିଦୟିତା ।
ଦୋଷାଲୟସ୍ୟ ମମ ଦୋଷାନପୋହ୍ୟ ଗତଦୋଷାଭିନନ୍ଦ୍ୟମହିମା
ଶେଷାଶନାହିରିପୁଶେଷାଦିସମ୍ପଦ ବିଶେଷାଂ ଦଦାତୁ ବିଭବାନ୍ ॥ ୮॥
ଇତି ଶ୍ରୀକମଲାଷ୍ଟକଂ ସମ୍ପୂର୍ଣମ୍ ।
ସ୍ତୋତ୍ରସମୁଚ୍ଚୟଃ ୨ (୮୪)
.
Comments
Post a Comment