ଶ୍ରୀମହାଲକ୍ଷ୍ମୀସୁପ୍ରଭାତମ୍
ଶ୍ରୀମହାଲକ୍ଷ୍ମୀସୁପ୍ରଭାତମ୍ ॥
ଶ୍ରୀଲକ୍ଷ୍ମି ଶ୍ରୀମହାଲକ୍ଷ୍ମି କ୍ଷୀରସାଗରକନ୍ୟକେ
ଉତ୍ତିଷ୍ଠ ହରିସମ୍ପ୍ରୀତେ ଭକ୍ତାନାଂ ଭାଗ୍ୟଦାୟିନି ।
ଉତ୍ତିଷ୍ଠୋତ୍ତିଷ୍ଠ ଶ୍ରୀଲକ୍ଷ୍ମି ବିଷ୍ଣୁବକ୍ଷସ୍ଥଲାଲୟେ
ଉତ୍ତିଷ୍ଠ କରୁଣାପୂର୍ଣେ ଲୋକାନାଂ ଶୁଭଦାୟିନି ॥ ୧॥
ଶ୍ରୀପଦ୍ମମଧ୍ୟବସିତେ ବରପଦ୍ମନେତ୍ରେ
ଶ୍ରୀପଦ୍ମହସ୍ତଚିରପୂଜିତପଦ୍ମପାଦେ ।
ଶ୍ରୀପଦ୍ମଜାତଜନନି ଶୁଭପଦ୍ମବକ୍ତ୍ରେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨॥
ଜାମ୍ବୂନଦାଭସମକାନ୍ତିବିରାଜମାନେ
ତେଜୋସ୍ୱରୂପିଣି ସୁବର୍ଣବିଭୂଷିତାଙ୍ଗି ।
ସୌବର୍ଣବସ୍ତ୍ରପରିବେଷ୍ଟିତଦିବ୍ୟଦେହେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୩॥
ସର୍ୱାର୍ଥସିଦ୍ଧିଦେ ବିଷ୍ଣୁମନୋଽନୁକୂଲେ
ସମ୍ପ୍ରାର୍ଥିତାଖିଲଜନାବନଦିବ୍ୟଶୀଲେ ।
ଦାରିଦ୍ର୍ୟଦୁଃଖଭୟନାଶିନି ଭକ୍ତପାଲେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୪॥
ଚନ୍ଦ୍ରାନୁଜେ କମଲକୋମଲଗର୍ଭଜାତେ
ଚନ୍ଦ୍ରାର୍କବହ୍ନିନୟନେ ଶୁଭଚନ୍ଦ୍ରବକ୍ତ୍ରେ ।
ହେ ଚନ୍ଦ୍ରିକାସମସୁଶୀତଲମନ୍ଦହାସେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୫॥
ଶ୍ରୀଆଦିଲକ୍ଷ୍ମି ସକଲେପ୍ସିତଦାନଦକ୍ଷେ
ଶ୍ରୀଭାଗ୍ୟଲକ୍ଷ୍ମି ଶରଣାଗତ ଦୀନପକ୍ଷେ ।
ଐଶ୍ୱର୍ୟଲକ୍ଷ୍ମି ଚରଣାର୍ଚିତଭକ୍ତରକ୍ଷିନ୍
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୬॥
ଶ୍ରୀଧୈର୍ୟଲକ୍ଷ୍ମି ନିଜଭକ୍ତହୃଦନ୍ତରସ୍ଥେ
ସନ୍ତାନଲକ୍ଷ୍ମି ନିଜଭକ୍ତକୁଲପ୍ରବୃଦ୍ଧେ ।
ଶ୍ରୀଜ୍ଞାନଲକ୍ଷ୍ମି ସକଲାଗମଜ୍ଞାନଦାତ୍ରି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୭॥
ସୌଭାଗ୍ୟଦାତ୍ରି ଶରଣଂ ଗଜଲକ୍ଷ୍ମି ପାହି
ଦାରିଦ୍ର୍ୟଧ୍ୱଂସିନି ନମୋ ବରଲକ୍ଷ୍ମି ପାହି ।
ସତ୍ସୌଖ୍ୟଦାୟିନି ନମୋ ଧନଲକ୍ଷ୍ମି ପାହି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୮॥
ଶ୍ରୀରାଜ୍ୟଲକ୍ଷ୍ମି ନୃପବେଶ୍ମଗତେ ସୁହାସିନ୍
ଶ୍ରୀୟୋଗଲକ୍ଷ୍ମି ମୁନିମାନସପଦ୍ମବାସିନ୍ ।
ଶ୍ରୀଧାନ୍ୟଲକ୍ଷ୍ମି ସକଲାବନିକ୍ଷେମଦାତ୍ରି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୯॥
ଶ୍ରୀପାର୍ୱତୀ ତ୍ୱମସି ଶ୍ରୀକରି ଶୈବଶୈଲେ
କ୍ଷୀରୋଦଧେସ୍ତ୍ୱମସି ପାବନି ସିନ୍ଧୁକନ୍ୟା ।
ସ୍ୱର୍ଗସ୍ଥଲେ ତ୍ୱମସି କୋମଲେ ସ୍ୱର୍ଗଲକ୍ଷ୍ମୀ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୦॥
ଗଙ୍ଗା ତ୍ୱମେବ ଜନନୀ ତୁଲସୀ ତ୍ୱମେବ
କୃଷ୍ଣପ୍ରିୟା ତ୍ୱମସି ଭାଣ୍ଡିରଦିବ୍ୟକ୍ଷେତ୍ରେ ।
ରାଜଗୃହେ ତ୍ୱମସି ସୁନ୍ଦରି ରାଜ୍ୟଲକ୍ଷ୍ମୀ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୧॥
ପଦ୍ମାବତୀ ତ୍ୱମସି ପଦ୍ମବନେ ବରେଣ୍ୟେ
ଶ୍ରୀସୁନ୍ଦରୀ ତ୍ୱମସି ଶ୍ରୀଶତଶୃଙ୍ଗକ୍ଷେତ୍ରେ ।
ତ୍ୱଂ ଭୂତଲେଽସି ଶୁଭଦାୟିନି ମର୍ତ୍ୟଲକ୍ଷ୍ମୀ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୨॥
ଚନ୍ଦ୍ରା ତ୍ୱମେବ ବରଚନ୍ଦନକାନନେଷୁ
ଦେବି କଦମ୍ବବିପିନେଽସି କଦମ୍ବମାଲା ।
ତ୍ୱଂ ଦେବି କୁନ୍ଦବନବାସିନି କୁନ୍ଦଦନ୍ତୀ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୩॥
ଶ୍ରୀବିଷ୍ଣୁପତ୍ନି ବରଦାୟିନି ସିଦ୍ଧଲକ୍ଷ୍ମି
ସନ୍ମାର୍ଗଦର୍ଶିନି ଶୁଭଙ୍କରି ମୋକ୍ଷଲକ୍ଷ୍ମି ।
ଶ୍ରୀଦେବଦେବି କରୁଣାଗୁଣସାରମୂର୍ତେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୪॥
ଅଷ୍ଟୋତ୍ତରାର୍ଚନପ୍ରିୟେ ସକଲେଷ୍ଟଦାତ୍ରି
ହେ ବିଶ୍ୱଧାତ୍ରି ସୁରସେବିତପାଦପଦ୍ମେ ।
ସଙ୍କଷ୍ଟନାଶିନି ସୁଖଙ୍କରି ସୁପ୍ରସନ୍ନେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୫॥
ଆଦ୍ୟନ୍ତରହିତେ ବରବର୍ଣିନି ସର୍ୱସେବ୍ୟେ
ସୂକ୍ଷ୍ମାତିସୂକ୍ଷ୍ମତରରୂପିଣି ସ୍ଥୂଲରୂପେ ।
ସୌନ୍ଦର୍ୟଲକ୍ଷ୍ମି ମଧୁସୂଦନମୋହନାଙ୍ଗି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୬॥
ସୌଖ୍ୟପ୍ରଦେ ପ୍ରଣତମାନସଶୋକହନ୍ତ୍ରି
ଅମ୍ବେ ପ୍ରସୀଦ କରୁଣାସୁଧୟାଽଽର୍ଦ୍ରଦୃଷ୍ଟ୍ୟା ।
ସୌବର୍ଣହାରମଣିନୂପୁରଶୋଭିତାଙ୍ଗି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୭॥
ନିତ୍ୟଂ ପଠାମି ଜନନି ତବ ନାମ ସ୍ତୋତ୍ରଂ
ନିତ୍ୟଂ କରୋମି ତବ ନାମଜପଂ ବିଶୁଦ୍ଧେ ।
ନିତ୍ୟଂ ଶୃଣୋମି ଭଜନଂ ତବ ଲୋକମାତଃ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୮॥
ମାତା ତ୍ୱମେବ ଜନନୀ ଜନକସ୍ତ୍ୱମେବ
ଦେବି ତ୍ୱମେବ ମମ ଭାଗ୍ୟନିଧିସ୍ତ୍ୱମେବ ।
ସଦ୍ଭାଗ୍ୟଦାୟିନି ତ୍ୱମେବ ଶୁଭପ୍ରଦାତ୍ରୀ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୧୯॥
ବୈକୁଣ୍ଠଧାମନିଲୟେ କଲିକଲ୍ମଷଘ୍ନେ
ନାକାଧିନାଥବିନୁତେ ଅଭୟପ୍ରଦାତ୍ରି ।
ସଦ୍ଭକ୍ତରକ୍ଷଣପରେ ହରିଚିତ୍ତବାସିନ୍
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨୦॥
ନିର୍ୱ୍ୟାଜପୂର୍ଣକରୁଣାରସସୁପ୍ରବାହେ
ରାକେନ୍ଦୁବିମ୍ବବଦନେ ତ୍ରିଦଶାଭିବନ୍ଦ୍ୟେ ।
ଆବ୍ରହ୍ମକୀଟପରିପୋଷିଣି ଦାନହସ୍ତେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨୧॥
ଲକ୍ଷ୍ମୀତି ପଦ୍ମନିଲୟେତି ଦୟାପରେତି
ଭାଗ୍ୟପ୍ରଦେତି ଶରଣାଗତବତ୍ସଲେତି ।
ଧ୍ୟାୟାମି ଦେବି ପରିପାଲୟ ମାଂ ପ୍ରସନ୍ନେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨୨॥
ଶ୍ରୀପଦ୍ମନେତ୍ରରମଣୀବରେ ନୀରଜାକ୍ଷି
ଶ୍ରୀପଦ୍ମନାଭଦୟିତେ ସୁରସେବ୍ୟମାନେ ।
ଶ୍ରୀପଦ୍ମୟୁଗ୍ମଧୃତନୀରଜହସ୍ତୟୁଗ୍ମେ
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨୩॥
ଇତ୍ଥଂ ତ୍ୱଦୀୟକରୁଣାତ୍କୃତସୁପ୍ରଭାତଂ
ଯେ ମାନବାଃ ପ୍ରତିଦିନଂ ପ୍ରପଠନ୍ତି ଭକ୍ତ୍ୟା ।
ତେଷାଂ ପ୍ରସନ୍ନହୃଦୟେ କୁରୁ ମଙ୍ଗଲାନି
ଶ୍ରୀଲକ୍ଷ୍ମି ଭକ୍ତବରଦେ ତବ ସୁପ୍ରଭାତମ୍ ॥ ୨୪॥
ଜଲଧୀଶସୁତେ ଜଲଜାକ୍ଷବୃତେ ଜଲଜୋଦ୍ଭବସନ୍ନୁତେ ଦିବ୍ୟମତେ ।
ଜଲଜାନ୍ତରନିତ୍ୟନିବାସରତେ ଶରଣଂ ଶରଣଂ ବରଲକ୍ଷ୍ମି ନମଃ ॥ ୨୫॥
ପ୍ରଣତାଖିଲଦେବପଦାବ୍ଜୟୁଗେ ଭୁବନାଖିଲପୋଷଣ ଶ୍ରୀବିଭବେ ।
ନବପଙ୍କଜହାରବିରାଜଗଲେ ଶରଣଂ ଶରଣଂ ଗଜଲକ୍ଷ୍ମି ନମଃ ॥ ୨୬॥
ଘନଭୀକରକଷ୍ଟବିନାଶକରି ନିଜଭକ୍ତଦରିଦ୍ରପ୍ରଣାଶକରି ।
ଋଣମୋଚନି ପାବନି ସୌଖ୍ୟକରି ଶରଣଂ ଶରଣଂ ଧନଲକ୍ଷ୍ମି ନମଃ ॥ ୨୭॥
ଅତିଭୀକରକ୍ଷାମବିନାଶକରି ଜଗଦେକଶୁଭଙ୍କରି ଧାନ୍ୟପ୍ରଦେ ।
ସୁଖଦାୟିନି ଶ୍ରୀଫଲଦାନକରି ଶରଣଂ ଶରଣଂ ଶୁଭଲକ୍ଷ୍ମି ନମଃ ॥ ୨୮॥
ସୁରସଙ୍ଘଶୁଭଙ୍କରି ଜ୍ଞାନପ୍ରଦେ ମୁନିସଙ୍ଘପ୍ରିୟଙ୍କରି ମୋକ୍ଷପ୍ରଦେ ।
ନରସଙ୍ଘଜୟଙ୍କରି ଭାଗ୍ୟପ୍ରଦେ ଶରଣଂ ଶରଣଂ ଜୟଲକ୍ଷ୍ମି ନମଃ ॥ ୨୯॥
ପରିସେବିତଭକ୍ତକୁଲୋଦ୍ଧରିଣି ପରିଭାବିତଦାସଜନୋଦ୍ଧରିଣି ।
ମଧୁସୂଦନମୋହିନି ଶ୍ରୀରମଣି ଶରଣଂ ଶରଣଂ ତବ ଲକ୍ଷ୍ମି ନମଃ ॥ ୨୮॥
ଶୁଭଦାୟିନି ବୈଭବଲକ୍ଷ୍ମି ନମୋ ବରଦାୟିନି ଶ୍ରୀହରିଲକ୍ଷ୍ମି ନମଃ ।
ସୁଖଦାୟିନି ମଙ୍ଗଲଲକ୍ଷ୍ମି ନମୋ ଶରଣଂ ଶରଣଂ ସତତଂ ଶରଣମ୍ ॥ ୨୯॥
ବରଲକ୍ଷ୍ମି ନମୋ ଧନଲକ୍ଷ୍ମି ନମୋ ଜୟଲକ୍ଷ୍ମି ନମୋ ଗଜଲକ୍ଷ୍ମି ନମଃ ।
ଜୟ ଷୋଡଶଲକ୍ଷ୍ମି ନମୋଽସ୍ତୁ ନମୋ ଶରଣଂ ଶରଣଂ ସତତଂ ଶରଣମ୍ ॥ ୩୦॥
ନମୋ ଆଦିଲକ୍ଷ୍ମି ନମୋ ଜ୍ଞାନଲକ୍ଷ୍ମି ନମୋ ଧାନ୍ୟଲକ୍ଷ୍ମି ନମୋ ଭାଗ୍ୟଲକ୍ଷ୍ମି ।
ମହାଲକ୍ଷ୍ମି ସନ୍ତାନଲକ୍ଷ୍ମି ପ୍ରସୀଦ ନମସ୍ତେ ନମସ୍ତେ ନମୋ ଶାନ୍ତଲକ୍ଷ୍ମି ॥ ୩୦॥
ନମୋ ସିଦ୍ଧିଲକ୍ଷ୍ମି ନମୋ ମୋକ୍ଷଲକ୍ଷ୍ମି ନମୋ ଯୋଗଲକ୍ଷ୍ମି ନମୋ ଭୋଗଲକ୍ଷ୍ମି ।
ନମୋ ଧୈର୍ୟଲକ୍ଷ୍ମି ନମୋ ବୀରଲକ୍ଷ୍ମି ନମସ୍ତେ ନମସ୍ତେ ନମୋ ଶାନ୍ତଲକ୍ଷ୍ମି ॥ ୩୧॥
ଅଜ୍ଞାନିନା ମୟା ଦୋଷାନଶେଷାନ୍ୱିହିତାନ୍ ରମେ ।
କ୍ଷମସ୍ୱ ତ୍ୱଂ କ୍ଷମସ୍ୱ ତ୍ୱଂ ଅଷ୍ଟଲକ୍ଷ୍ମି ନମୋଽସ୍ତୁତେ ॥ ୩୨॥
ଦେବି ବିଷ୍ଣୁବିଲାସିନି ଶୁଭକରି ଦୀନାର୍ତିବିଚ୍ଛେଦିନି
ସର୍ୱୈଶ୍ୱର୍ୟପ୍ରଦାୟିନି ସୁଖକରି ଦାରିଦ୍ର୍ୟବିଧ୍ୱଂସିନି ।
ନାନାଭୂଷିତଭୂଷଣାଙ୍ଗି ଜନନି କ୍ଷୀରାବ୍ଧିକନ୍ୟାମଣି
ଦେବି ଭକ୍ତସୁପୋଷିଣି ବରପ୍ରଦେ ଲକ୍ଷ୍ମି ସଦା ପାହି ନଃ ॥ ୩୩॥ ମାମ୍
ସଦ୍ୟଃପ୍ରଫୁଲ୍ଲସରସୀରୁହପତ୍ରନେତ୍ରେ
ହାରିଦ୍ରଲେପିତସୁକୋମଲଶ୍ରୀକପୋଲେ ।
ପୂର୍ଣେନ୍ଦୁବିମ୍ବବଦନେ କମଲାନ୍ତରସ୍ଥେ
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୪॥
ଭକ୍ତାନ୍ତରଙ୍ଗଗତଭାବବିଧେ ନମସ୍ତେ
ରକ୍ତାମ୍ବୁଜାତନିଲୟେ ସ୍ୱଜନାନୁରକ୍ତେ ।
ମୁକ୍ତାବଲୀସହିତଭୂଷଣଭୂଷିତାଙ୍ଗି
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୫॥
କ୍ଷାମାଦିତାପହାରିଣି ନବଧାନ୍ୟରୂପେ
ଅଜ୍ଞାନଘୋରତିମିରାପହଜ୍ଞାନରୂପେ ।
ଦାରିଦ୍ର୍ୟଦୁଃଖପରିମର୍ଦିତଭାଗ୍ୟରୂପେ
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୬॥
ଚମ୍ପାଲତାଭଦରହାସବିରାଜବକ୍ତ୍ରେ
ବିମ୍ବାଧରେଷୁ କପିକାଞ୍ଚିତମଞ୍ଜୁବାଣି ।
ଶ୍ରୀସ୍ୱର୍ଣକୁମ୍ଭପରିଶୋଭିତଦିବ୍ୟହସ୍ତେ
ଲକ୍ଷ୍ମି ତ୍ୱତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୭॥
ସ୍ୱର୍ଗାପବର୍ଗପଦବିପ୍ରଦେ ସୌମ୍ୟଭାବେ
ସର୍ୱାଗମାଦିବିନୁତେ ଶୁଭଲକ୍ଷଣାଙ୍ଗି ।
ନିତ୍ୟାର୍ଚିତାଙ୍ଘ୍ରିୟୁଗଲେ ମହିମାଚରିତ୍ରେ
ଲକ୍ଷ୍ମି ତ୍ୱତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୮॥
ଜାଜ୍ଜ୍ୱଲ୍ୟକୁଣ୍ଡଲବିରାଜିତକର୍ଣୟୁଗ୍ମେ
ସୌବର୍ଣକଙ୍କଣସୁଶୋଭିତହସ୍ତପଦ୍ମେ ।
ମଞ୍ଜୀରଶିଞ୍ଜିତସୁକୋମଲପାବନାଙ୍ଘ୍ରେ
ଲକ୍ଷ୍ମି ତ୍ୱତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୩୯॥
ସର୍ୱାପରାଧଶମନି ସକଲାର୍ଥଦାତ୍ରି
ପର୍ୱେନ୍ଦୁସୋଦରି ସୁପର୍ୱଗଣାଭିରକ୍ଷିନ୍ ।
ଦୁର୍ୱାରଶୋକମୟଭକ୍ତଗଣାବନେଷ୍ଟେ
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୪୦॥
ବୀଜାକ୍ଷରତ୍ରୟବିରାଜିତମନ୍ତ୍ରୟୁକ୍ତେ
ଆଦ୍ୟନ୍ତବର୍ଣମୟଶୋଭିତଶବ୍ଦରୂପେ ।
ବ୍ରହ୍ମାଣ୍ଡଭାଣ୍ଡଜନନି କମଲାୟତାକ୍ଷି
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୪୧॥
ଶ୍ରୀଦେବି ବିଲ୍ୱନିଲୟେ ଜୟ ବିଶ୍ୱମାତଃ var ବସୁଦାୟିନି
ଆହ୍ଲାଦଦାତ୍ରି ଧନଧାନ୍ୟସୁଖପ୍ରଦାତ୍ରି ।
ଶ୍ରୀବୈଷ୍ଣବି ଦ୍ରବିଣରୂପିଣି ଦୀର୍ଘବେଣି
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୪୨॥
ଆଗଚ୍ଛ ତିଷ୍ଠ ତବ ଭକ୍ତଗଣସ୍ୟ ଗେହେ
ସନ୍ତୁଷ୍ଟପୂର୍ଣହୃଦୟେନ ସୁଖାନି ଦେହି ।
ଆରୋଗ୍ୟଭାଗ୍ୟମକଲଙ୍କୟଶାଂସି ଦେହି
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୪୩॥
ଶ୍ରୀଆଦିଲକ୍ଷ୍ମି ଶରଣଂ ଶରଣଂ ପ୍ରପଦ୍ୟେ
ଶ୍ରୀଅଷ୍ଟଲକ୍ଷ୍ମି ଶରଣଂ ଶରଣଂ ପ୍ରପଦ୍ୟେ ।
ଶ୍ରୀବିଷ୍ଣୁପତ୍ନି ଶରଣଂ ଶରଣଂ ପ୍ରପଦ୍ୟେ
ଲକ୍ଷ୍ମି ତ୍ୱଦୀୟଚରଣୌ ଶରଣଂ ପ୍ରପଦ୍ୟେ ॥ ୪୪॥
ମଙ୍ଗଲଂ କରୁଣାପୂର୍ଣେ ମଙ୍ଗଲଂ ଭାଗ୍ୟଦାୟିନି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୪୫॥
ଅଷ୍ଟକଷ୍ଟହରେ ଦେବି ଅଷ୍ଟଭାଗ୍ୟବିବର୍ଧିନି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୪୬॥
କ୍ଷୀରୋଦଧିସମୁଦ୍ଭୂତେ ବିଷ୍ଣୁବକ୍ଷସ୍ଥଲାଲୟେ ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୪୭॥
ଧନଲକ୍ଷ୍ମି ଧାନ୍ୟଲକ୍ଷ୍ମି ବିଦ୍ୟାଲକ୍ଷ୍ମି ଯଶସ୍କରି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୪୮॥
ସିଦ୍ଧଲକ୍ଷ୍ମି ମୋକ୍ଷଲକ୍ଷ୍ମି ଜୟଲକ୍ଷ୍ମି ଶୁଭଙ୍କରି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୪୯॥
ସନ୍ତାନଲକ୍ଷ୍ମି ଶ୍ରୀଲକ୍ଷ୍ମି ଗଜଲକ୍ଷ୍ମି ହରିପ୍ରିୟେ ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୫୦॥
ଦାରିଦ୍ର୍ୟନାଶିନି ଦେବି କୋଲ୍ହାପୁରନିବାସିନି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୫୧॥
ବରଲକ୍ଷ୍ମି ଧୈର୍ୟଲକ୍ଷ୍ମି ଶ୍ରୀଷୋଡଶଭାଗ୍ୟଙ୍କରି ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୫୨॥
ମଙ୍ଗଲଂ ମଙ୍ଗଲଂ ନିତ୍ୟଂ ମଙ୍ଗଲଂ ଜୟମଙ୍ଗଲମ୍ ।
ମଙ୍ଗଲଂ ଶ୍ରୀମହାଲକ୍ଷ୍ମି ମଙ୍ଗଲଂ ଶୁଭମଙ୍ଗଲମ୍ ॥ ୫୩॥
ଇତି ଶ୍ରୀମହାଲକ୍ଷ୍ମୀସୁପ୍ରଭାତଂ ସମ୍ପୂର୍ଣମ୍ ।
.
Comments
Post a Comment