ଶ୍ରୀଲକ୍ଷ୍ମୀସ୍ତୋତ୍ରଂ ଇନ୍ଦ୍ରରଚିତମ୍

 ଶ୍ରୀଲକ୍ଷ୍ମୀସ୍ତୋତ୍ରଂ ଇନ୍ଦ୍ରରଚିତମ୍ 

ଶ୍ରୀସମ୍ପଦାଲକ୍ଷ୍ମୀସ୍ତୋତ୍ରମ୍

(ବ୍ରହ୍ମବୈବର୍ତ୍ତେ ଇନ୍ଦ୍ରପ୍ରୋକ୍ତଂ ଦେବୀଭାଗବତେ ଚ ପୁରନ୍ଦରପ୍ରୋକ୍ତମ୍)

ଶ୍ରୀଗଣେଶାୟ ନମଃ ।

ଧ୍ୟାନମ୍ -

ସହସ୍ରଦଲପଦ୍ମସ୍ଥକର୍ଣିକାବାସିନୀଂ ପରାମ୍ ।

ଶରତ୍ପାର୍ୱଣକୋଟୀନ୍ଦୁପ୍ରଭାମୁଷ୍ଟିକରାଂ ପରାମ୍ ॥ ୧॥

ସ୍ୱତେଜସା ପ୍ରଜ୍ୱଲନ୍ତୀଂ ସୁଖଦୃଶ୍ୟାଂ ମନୋହରାମ୍ ।

ପ୍ରତପ୍ତକାଞ୍ଚନନିଭଶୋଭାଂ ମୂର୍ତିମତୀଂ ସତୀମ୍ ॥ ୨॥

ରତ୍ନଭୂଷଣଭୂଷାଢ୍ୟାଂ ଶୋଭିତାଂ ପୀତବାସସା ।

ଈଷଦ୍ଧାସ୍ୟପ୍ରସନ୍ନାସ୍ୟାଂ ଶଶ୍ୱତ୍ସୁସ୍ଥିରୟୌବନାମ୍ ।

ସର୍ୱସମ୍ପତ୍ପ୍ରଦାତ୍ରୀଂ ଚ ମହାଲକ୍ଷ୍ମୀଂ ଭଜେ ଶୁଭାମ୍ ॥ ୩॥

ଇନ୍ଦ୍ର ଉବାଚ -

ଓଁ ନମଃ କମଲବାସିନ୍ୟୈ ନାରାୟଣ୍ୟୈ ନମୋ ନମଃ ।

କୃଷ୍ଣପ୍ରିୟାୟୈ ସାରାୟୈ ପଦ୍ମାୟୈ ଚ ନମୋ ନମଃ ॥ ୧॥

ପଦ୍ମପତ୍ରେକ୍ଷଣାୟୈ ଚ ପଦ୍ମାସ୍ୟାୟୈ ନମୋ ନମଃ ।

ପଦ୍ମାସନାୟୈ ପଦ୍ମିନ୍ୟୈ ବୈଷ୍ଣବ୍ୟୈ ଚ ନମୋ ନମଃ ॥ ୨॥

ସର୍ୱସମ୍ପତ୍ସ୍ୱରୂପାୟୈ ସର୍ୱଦାତ୍ର୍ୟୈ ନମୋ ନମଃ ।

ସୁଖଦାୟୈ ମୋକ୍ଷଦାୟୈ ସିଦ୍ଧିଦାୟୈ ନମୋ ନମଃ ॥ ୩॥

ହରିଭକ୍ତିପ୍ରଦାତ୍ର୍ୟୈ ଚ ହର୍ଷଦାତ୍ର୍ୟୈ ନମୋ ନମଃ ।

କୃଷ୍ଣବକ୍ଷଃସ୍ଥିତାୟୈ ଚ କୃଷ୍ଣେଶାୟୈ ନମୋ ନମଃ ॥ ୪॥

କୃଷ୍ଣଶୋଭାସ୍ୱରୂପାୟୈ ରତ୍ନପଦ୍ମେ ଚ ଶୋଭନେ ।

ସମ୍ପତ୍ୟଧିଷ୍ଠାତୃଦେବ୍ୟୈ ମହାଦେବ୍ୟୈ ନମୋ ନମଃ ॥ ୫॥

ଶନ୍ୟାଧିଷ୍ଠାଦେବ୍ୟୈ ଚ ଶସ୍ୟାୟୈ ଚ ନମୋ ନମଃ ।

ନମୋ ବୁଦ୍ଧିସ୍ୱରୂପାୟୈ ବୁଦ୍ଧିଦାୟୈ ନମୋ ନମଃ ॥ ୬॥

ବୈକୁଣ୍ଠେ ଯା ମହାଲକ୍ଷ୍ମୀର୍ଲକ୍ଷ୍ମୀଃ କ୍ଷୀରୋଦସାଗରେ ।

ସ୍ୱର୍ଗଲକ୍ଷ୍ମୀରିନ୍ଦ୍ରଗେହେ ରାଜଲକ୍ଷ୍ମୀର୍ନପାଲୟେ ॥ ୭॥

ଗୃହଲକ୍ଷ୍ମୀଶ୍ଚ ଗୃହିଣାଂ ଗେହେ ଚ ଗୃହଦେବତା ।

ସୁରଭି ସା ଗବାଂ ମାତା ଦକ୍ଷିଣା ଯଜ୍ଞକାମନୀ ॥ ୮॥

ଅଦିତିର୍ଦେବମାତା ତ୍ୱଂ କମଲା କମଲାଲୟେ ।

ସ୍ୱାହା ତ୍ୱଂ ଚ ହବିର୍ଦାନେ କବ୍ୟଦାନେ ସ୍ୱଧା ସ୍ମୃତା ॥ ୯॥

ତ୍ୱଂ ହି ବିଷ୍ଣୁସ୍ୱରୂପା ଚ ସର୍ୱାଧାରା ବସୁନ୍ଧରା ।

ଶୁଦ୍ଧସତ୍ୱସ୍ୱରୂପା ତ୍ୱଂ ନାରାୟଣପରାୟାଣା ॥ ୧୦॥

କ୍ରୋଧହିଂସାବର୍ଜିତା ଚ ବରଦା ଚ ଶୁଭାନନା ।

ପରମାର୍ଥପ୍ରଦା ତ୍ୱଂ ଚ ହରିଦାସ୍ୟପ୍ରଦା ପରା ॥ ୧୧॥

ଯୟା ବିନା ଜଗତ୍ ସର୍ୱେ ଭସ୍ମୀଭୂତମସାରକମ୍ ।

ଜୀବନ୍ମୃତଂ ଚ ବିଶ୍ୱଂ ଚ ଶବତୁଲ୍ୟଂ ଯୟା ବିନା ॥ ୧୨॥

ସର୍ୱେଷାଂ ଚ ପରା ତ୍ୱଂ ହି ସର୍ୱବାନ୍ଧବରୂପିଣୀ ।

ଯୟା ବିନା ନ ସମ୍ଭାପ୍ୟୋ ବାଧ୍ୱବୈର୍ବାନ୍ଧବଃ ସଦା ॥ ୧୩॥

ତ୍ୱୟା ହୀନୋ ବନ୍ଧୁହୀନସ୍ୱତ୍ୱୟା ଯୁକ୍ତଃ ସବାନ୍ଧବଃ ।

ଧର୍ମାର୍ଥକାମମୋକ୍ଷାଣାଂ ତ୍ୱଂ ଚ କାରଣରୂପିଣୀ ॥ ୧୪॥

ଯଥା ମାତା ସ୍ତନାନ୍ଧାନାଂ ଶିଶୂନାଂ ଶୈଶବେ ସଦା ।

ତଥା ତ୍ୱଂ ସର୍ୱଦା ମାତା ସର୍ୱେଷାଂ ସର୍ୱରୂପତାଃ ॥ ୧୫॥

ମାତୃହୀନ ସ୍ନନାନ୍ଧସ୍ତୁ ସ ଚେଜ୍ଜୀବତି ଦୈବତଃ ।

ତ୍ୱୟା ହୀନୋ ଜନଃକୋଽପି ନ ଜୀବତ୍ୟେବ ନିଶ୍ଚିତମ୍ ॥ ୧୬॥

ସୁପ୍ରସନ୍ନସ୍ୱରୂପା ତ୍ୱଂ ମାଂ ପ୍ରସନ୍ନା ଭବାମ୍ବିକେ ।

ବୈରିଗ୍ରସ୍ତଂ ଚ ବିଷୟଂ ଦେହି ମହ୍ମଂ ସନାତନି ॥ ୧୭॥

ବୟଂ ଯାବତ୍ ତ୍ୱୟା ହୀନା ବନ୍ଧୁହୀନଶ୍ଚ ଭିକ୍ଷୁକାଃ ।

ସର୍ୱସମ୍ପଦ୍ୱିହୀନାଶ୍ଚ ତାବଦେବ ହରିପ୍ରିୟେ ॥ ୧୮॥

ରାଜ୍ୟଂ ଦେହି ଶ୍ରିୟଂ ଦେହି ବଲଂ ଦେହି ସୁରେଶ୍ୱରି ।

କୀର୍ତି ଦେହି ଧନଂ ଦେହି ଯଶୋ ମହ୍ମଂ ଚ ଦେହି ବୈ ॥ ୧୯॥

କାମଂ ଦେହି ମତିଂ ଦେହି ଭୋଗାନ ଦେହି ହରିପ୍ରିୟେ ।

ଜ୍ଞାନଂ ଦେହି ଚ ଧର୍ମେ ଚ ସର୍ୱସୌଭାଗ୍ୟମୀପ୍ସିତମ୍ ॥ ୨୦॥

ପ୍ରଭାବାଂ ଚ ପ୍ରତାପଂ ଚ ସର୍ୱାଧିକାରମେବ ଚ ।

ଜୟଂ ପରାକ୍ରମଂ ଯୁଦ୍ଧେ ପରମୈଶ୍ୱର୍ୟମୈବ ଚ ॥ ୨୧॥

ଇତ୍ୟୁକ୍ତ୍ୱା ଚ ମହେନ୍ଦ୍ରଶ୍ଚ ସର୍ୱୈଃ ସୁରଗଣୈଃ ସହ ।

ପ୍ରଣମାମ ସାଶ୍ରୁନେତ୍ରୋ ମୂର୍ଧ୍ନା ଚୈବ ପୁନଃ ପୁନଃ ॥ ୨୨॥

ବ୍ରହ୍ମା ଚ ଶଙ୍କରଶ୍ଚୈବ ଶେଷୋ ଧର୍ମଶ୍ଚ କେଶବଃ ।

ସର୍ୱେଚକ୍ରୁଃ ପରିହାରଂ ସୁରାର୍ଥେ ଚ ପୁନଃ ପୁନଃ ॥ ୨୩॥

ଦେବେଭ୍ୟଶ୍ଚ ବରଂ ଦତ୍ୱା ପୁଷ୍ପମାଲାଂ ମନୋହରାମ୍ ।

କେଶବାୟ ଦଦା ଲକ୍ଷ୍ମୀଃ ସନ୍ତୁଷ୍ଟା ସୁରସଂସଦି ॥ ୨୪॥

ଯୟୁର୍ଦେବାଶ୍ଚ ସନ୍ତୁଷ୍ଟାଃ ସ୍ୱଂ ସ୍ୱଂ ସ୍ଥାନଞ୍ଚ ନାରଦ ।

ଦେବୀ ଯୟୌ ହରେଃ ସ୍ଥାନଂ ହୃଷ୍ଟା କ୍ଷୀରୋଦଶାୟିନଃ ॥ ୨୫॥ (ହରେଃ କ୍ରୋଡଂ)

ଯୟତୁଶ୍ଚୈୟ ସ୍ୱଗୃହଂ ବ୍ରହ୍ମେଶାନୌ ଚ ନାରଦ ।

ଦତ୍ତ୍ୱା ଶୁଭାଶିଷଂ ତୌ ଚ ଦେବେଭ୍ୟଃ ପ୍ରୀତିପୂର୍ୱକମ୍ ॥ ୨୬॥

ଇଦଂ ସ୍ତୋତ୍ରଂ ମହାପୁଣ୍ୟଂ ତ୍ରିସନ୍ଧ୍ୟଂ ଯଃ ପଠେନ୍ନରଃ । (ଚ ପଠେନ୍ନରଃ)

କୁବେରତୁଲ୍ୟଃ ସ ଭବେତ୍ ରାଜରାଜେଶ୍ୱରୋ ମହାନ୍ ॥ ୨୭॥

ସିଦ୍ଧସ୍ତୋତ୍ରଂ ଯଦି ପଠେତ୍ ସୋଽପି କଲ୍ପତରୂର୍ନରଃ ।

ପଞ୍ଚଲକ୍ଷଜପେନୈବ ସ୍ତୋତ୍ରସିଦ୍ଧିର୍ଭବେନ୍ନୃଣାମ୍ ॥ ୨୮॥

ସିଦ୍ଧସ୍ତୋତ୍ରଂ ଯଦି ପଠେନ୍ମାସମେକଂ ଚ ସଂୟତଃ ।

ମହାସୁଖୀ ଚ ରାଜେନ୍ଦ୍ରୋ ଭବିଷ୍ୟତି ନ ସଂଶୟଃ ॥ ୨୯॥

ଇତି ଶ୍ରୀବ୍ରହ୍ମବୈବର୍ତ୍ତେ ମହାପୁରାଣେ ଦ୍ୱିତୀୟେ ପ୍ରକୃତିଖଣ୍ଡେ ନାରଦନାରାୟଣସମ୍ବାଦେ

ଲକ୍ଷ୍ମୀପୂଜନବିଧାନନାମୈକୋନଚତ୍ୱାରିଂଶତ୍ତମୋଽଧ୍ୟାୟେ ଲକ୍ଷ୍ମୀଉପାଖ୍ୟାନେ

ଇନ୍ଦ୍ରକୃତଂ ଲକ୍ଷ୍ମୀସ୍ତୋତ୍ରମ୍ ସମ୍ପୂର୍ଣମ୍ । ୨(ପ୍ରକୃତି ଖଣ୍ଡ).୩୯.୫୨-୭୨

ଦେବୀଭାଗବତପୁରାଣେ ନବମସ୍କନ୍ଧେ ଅଧ୍ୟାୟ ୪୨

.