ଲକ୍ଷ୍ମୀଶତକମ୍
ଲକ୍ଷ୍ମୀଶତକମ୍
ଆନନ୍ଦଂ ଦିଶତୁ ଶ୍ରୀହସ୍ତିଗିରୌ ସ୍ୱସ୍ତିଦା ସଦା ମହ୍ୟମ୍ ।
ଯା କୌତୁକଂ ବିଧତ୍ତେ ସାକୃତେନାବଲୋକନେନ ହରେଃ ॥ ୧॥
ଯନ୍ନାମ କୀର୍ତନୀୟଂ ଶ୍ରୀରିତ୍ୟାଦୌ ପ୍ରିୟଂ ହରେର୍ନାମ୍ନାମ୍ ।
ସା ମେ ସମସ୍ତଜନନୀ ସନ୍ତତମୁଦୟାୟ ଭୂୟସେ ଭୂୟାତ୍ ॥ ୨॥
ଶ୍ରୀବରଦେଶ୍ୱରଦୟିତେ ବାଞ୍ଛାମି ତ୍ୱାଂ ଯଥାମତି ସ୍ତୋତୁମ୍ ।
ସ୍ୱଲ୍ପୋଽପି ଡିମ୍ଭଜଲ୍ପୋ ମାତୁଃ ପ୍ରୀତିଂ କଥଂ ନ ସଞ୍ଜନୟେତ୍ ॥ ୩॥
ମୁରରିପୁମୋହନଧାମ୍ନେ ମୂର୍ତିବିନିର୍ଧୂତବିଷ୍ଫୁରଦ୍ଧେମ୍ନେ ।
ଦିବିଷଦମେୟବିଭୂମ୍ନେ ଲକ୍ଷ୍ମୀନାମ୍ନେ ପରଂ ନମୋ ଭୁମ୍ନେ ॥ ୪॥
କରିଗିରିନାୟକକାନ୍ତେ ଦାନ୍ତଜନସ୍ୱାନ୍ତପଙ୍କଜନିଶାନ୍ତେ ।
ମୟି ଭବମରଣାଶ୍ରାନ୍ତେ କରୁଣାଂ ଶରଣାଗତେ କୁରୁ ପ୍ରଗୁଣାମ୍ ॥ ୫॥
ବାଚାମକୃତ୍ରିମାଣାମପି ମୁନିମନସାମଗୋଚରେ ଦେବି! ।
ତ୍ୱଦ୍ୱର୍ଣନେ ମଦୀୟାଂ କାଙ୍କ୍ଷାଂ ସଫଲାଂ କରୋତୁ ତେ କରୁଣା ॥ ୬॥
ମାଖଦ୍ୱିଧୁ ବିମ୍ବାସ୍ୟେ ମଙ୍ଗଲସୌମ୍ୟାକୃତେ ଗୁରୁଶ୍ରୋଣି ! ।
ଭୃଗୁନନ୍ଦିନି ମନ୍ଦଗତେ ରୋମଲତାହେ ଜୟାବ୍ଧିକୁଲକେତୋ ! ॥ ୭॥
ଧନ୍ୟଂ ପ୍ରସୂନଗର୍ଭଂ ଧମ୍ମିଲ୍ଲଂ ଦେବି ତାବକଂ ମନ୍ୟେ ।
ପ୍ରସବଶରେଣ ନ୍ୟସ୍ତଂ ତୂଣଂ ବାଣୌଘପୂର୍ଣମର୍ଣବଜେ ॥ ୮॥
ତ୍ୱତ୍କେଶପାଶଶୋଭାପରିମୋଷାଣାଂ ଫଲଂ ପୟୋଦାନାମ୍ ।
ଦେବି ତଟିଦ୍ଗୁଣବନ୍ଧୋ ନୋଦନମନିଲୈଃ ପଲାୟନଂ ଦିକ୍ଷୁ ॥ ୯॥
ନିନ୍ଦତି ନୀରଧିକନ୍ୟେ ! କଚନିଚୟସ୍ତେ କଲାପିନଂ କାନ୍ତ୍ୟା ।
ଅସ୍ୟତି ବର୍ହଂ ନ କଥଂ ଭୁଜଙ୍ଗବୃତ୍ତିଶ୍ଚ ପକ୍ଷପାତୀ ଚ ॥ ୧୦॥
ଜୟତୁ ବିପକ୍ଷଂ ପଦ୍ମେ ! ବର୍ହିଣବର୍ହଂ ତ୍ୱଦୀୟକେଶଭରମ୍ ।
ତ୍ୱତ୍କାନ୍ତସ୍ୟ ସପକ୍ଷଂ ଘନମପି କାନ୍ତ୍ୟା କଥଂ ପରାକୁରୁତେ ॥ ୧୧॥
ବର୍ହଂ ବିଗର୍ହିତାଭଂ ଶସ୍ତେନାନେନ କେଶହସ୍ତେନ ।
ମତ୍ୱାଭବନ୍ମୟୂରା ମନ୍ଦାଶା ଜୀବିତେ ବୃତବିଷାଶାଃ ॥ ୧୨॥
ଦିବ୍ୟାମମ୍ବୁଧିକନ୍ୟେ! ଦୃଷ୍ଟ୍ୱା କେଶଶ୍ରିୟଂ ତବାମ୍ଭୋଦାଃ !
ଆରୁହ୍ୟାଦ୍ରିଶ୍ରେଷ୍ଠଂ କୁରୁତେ ତ୍ରପୟେବ ଜୀବନତ୍ୟାଗମ୍ ॥ ୧୩॥
ସିନ୍ଦୂରସୁନ୍ଦରୀ ତେ ପଦ୍ମେ ! ସୀମନ୍ତପଦ୍ଧତିର୍ଭାତି ।
ବର୍ଷାବଲାହକସ୍ଥା ବିଦ୍ୟୁଲ୍ଲେଖେବ ବୀତଚାଞ୍ଚଲ୍ୟା ॥ ୧୪॥
ବେଣୀମମ୍ବୁଧିକନ୍ୟେ ! ଭୃଙ୍ଗଶ୍ରେଣୀମିବ ସ୍ଫୁରନ୍ତୀ ତେ ।
ଶମ୍ବରବୈରିକୃପାଣୀଂ ଶଙ୍କେ ମାନାପହାରିଣୀଂ ଶୌରେଃ ॥ ୧୫॥
ଫାଲେନାଭିମୁଖେନ ପ୍ରତିମାକାଙ୍କ୍ଷୀ ତବେନ୍ଦୁରମ୍ବୁଧିଜେ ! ।
ଅର୍ଧାକୃତିଃ କଲାଭିଃ ପୂର୍ଣୋ ଭବତି କ୍ରିୟାସମଭିହାରାତ୍ ॥ ୧୬॥
କର୍ଣାବତଂସଲକ୍ଷ୍ମୀ କଲୟତି କମଲେ ! ବିଶାଲଦୃଷ୍ଟିସ୍ତେ ।
ନୀଲୋତ୍ପଲସ୍ୟ କୃତ୍ୟଂ କିମିତି ଶ୍ରୁତିମୂଲଶାଲିନୀ ଚିନ୍ତ୍ୟମ୍ ॥ ୧୭॥
ବନ୍ଦୀକୃତଂ କଟାକ୍ଷୈରିନ୍ଦୀବରମେତଦିନ୍ଦିରେ ! ଶ୍ରବସି ।
ନ୍ୟସ୍ତଂ ପୁନଃ ପୁନସ୍ତନ୍ନିତ୍ୟଂ ଶଙ୍କୀବ ବୀକ୍ଷତେ ଚକ୍ଷୁଃ ॥ ୧୮॥
ନୟନମୁଦଞ୍ଚତ୍କରୁଣଂ ନାନାଶୃଙ୍ଗାରମଙ୍ଗଳାକାରମ୍ ।
ଦେବି ତ୍ୱଦାଶ୍ରିତାନାଂ କର୍ଣମତିକ୍ରବ୍ୟ କାଇକ୍ଷିତଂ ଦତ୍ତେ ॥ ୧୯॥
କଲ୍ଲୋଲିନୀଶକନ୍ୟେ ! ତ୍ୱଲ୍ଲୋଚନକାନ୍ତିଲିପ୍ସୟା କିଂ ବା ।
ଦ୍ୱିଜରାଜପାଦସେବାଂ ଜୀବଞ୍ଜୀବଃ କରୋତି ସର୍ୱୋଽପି ॥ ୨୦॥
ସ୍ଫୁରତି ତବ ଶ୍ରୁତ୍ୟନ୍ତେ ପତିରିତି ଯତ୍ ପ୍ରାହୁରମ୍ବ ! ବେଦବିଦଃ ।
ଶ୍ରୁତ୍ୟନ୍ତମେତି ତତ୍ତେ ଦୃଷ୍ଟିଃ କାନ୍ତାବଲୋକନାସକ୍ତା ॥ ୨୧॥
ଉଲ୍ଲଙ୍ଘିତଶ୍ରୁତୀନାମୁଦଧିସୁତେ ! ଶୋଭନଂ ନହୀତି ମୃଷା ।
ଯେନ ତବେଦଂ ବ୍ୟକ୍ତଂ ଶ୍ରୁତିପଥମୁଲ୍ଲଙ୍ଘ୍ୟ ଶୋଭନଂ ନୟନମ୍ ॥ ୨୨॥
ଶ୍ରୁତ୍ୟନ୍ତେ କୃତବସତିଃ ପାଦ୍ମରୁଚିଂ ତେ ପ୍ରକାଶୟନ୍ତ୍ୟବ୍ଜେ ! ।
ପରମାର୍ଗଦୃଷ୍ଟିସୃଷ୍ଟାଂ ଦୃଷ୍ଟିରିୟଂ ବୈଷ୍ଣବୀଂ ଚ ଦୂଷୟତି ॥ ୨୩॥
ଦେବି ! ନିମିତ୍ତଗୁଣସ୍ୟ କ୍ୱାପି ନ ଦୃଷ୍ଟଂ ହି କାର୍ୟସଙ୍କ୍ରମଣମ୍ ।
ଅନୃତମିତୀଦଂ ବଚନଂ ଯତ୍ୱଦପାଙ୍ଗାଦନଙ୍ଗସଦ୍ଭାବଃ ॥ ୨୪॥
ଆଦ୍ୟାବତାରଶୋଭାମଙ୍ଗୀକୁର୍ୱାଣସାତ୍ମନାଥସ୍ୟ ।
ନିରୁପମସୁଷମଂ କୋ ବା ଚକ୍ଷୁସ୍ତବ ଦେବି ! ଦକ୍ଷିଣଃ ସ୍ତୋତୁମ୍ ॥ ୨୫॥
ଅସୃଜତ୍ କମଲଂ ଧାତା ତୁଲନାଂ ଦେବୀକ୍ଷଣସ୍ୟ ତେ ବାଞ୍ଛନ୍ ।
ଅସଦୃଶଭାବାଦମୁନା ନାମ ପ୍ରାପ୍ତଂ ଜଲଜମିତ୍ୟୁଚିତମ୍ ॥ ୨୬॥
ଲୋକଜନନ୍ୟତିଭାସ୍ୱଲ୍ଲୋଚନଶଫରୀବିରାଜମାନଂ ତେ ।
କାନ୍ତଂ ନାସାବଂଶଂ କେତୁଂ ମଦନସ୍ୟ କେ ନ ଶଂସନ୍ତି ॥ ୨୭॥
ତ୍ୱନାସିକାତ୍ତଗନ୍ଧସ୍ତ୍ରପୟେବାଘୋମୁଖସ୍ତିଲପ୍ରସବଃ ।
ମୁହୁରଶ୍ରୂଣି ପ୍ରାୟୋ ମୁଞ୍ଚତି ମାତର୍ମରନ୍ଦବିନ୍ଦୁମିଷାତ୍ ॥ ୨୮॥
ନାସାମୌକ୍ତିକମେତନ୍ମନ୍ୟେ ବାରାଶିକନ୍ୟକେ! ଧନ୍ୟମ୍ ।
ତବ ମୁଖତାରାଧିପତେଃ କାମାଦେକଂ କଳଞମଙ୍ଗଗତମ୍ ॥ ୨୯॥
ମୁକ୍ତୋତ୍ପତ୍ତିସ୍ଥାନଂ ସରସିଜମିତି ଯତ୍ ସମସ୍ତକବିସିଦ୍ଧମ୍ ।
ତଦ୍ୱୟକ୍ତୀକରଣଂ ତେ ନାସାମୁକ୍ତାଫଲସ୍ୟ ଦେବି ! ଫଲମ୍ ॥ ୩୦॥
ପରିଭୂତକୁନ୍ଦକୁସୁମଂ ଭାସା ନାସାଗ୍ରଭାସ୍ୱରଂ ପଦ୍ମେ ! ।
ମୁକ୍ତାଫଲଂ ମୁରାରେର୍ମୋହନଗୁଡିକେବ ମାନ୍ମଥୀ ଭାତି ॥ ୩୧॥
ଭାସା ବିରାଜମାନଂ ନାସାମୁକ୍ତାଫଲଂ ମମ ସ୍ଫୁରତି ।
ଅମ୍ବ ! ତବାନନପଦ୍ମେ ସ୍ମିତରୁଚିହଂସୀପ୍ରସୂତମଣ୍ଡମିବ ॥ ୩୨॥
ଦୁର୍ୱୃତ୍ତଃ ଖଲୁ ଲୋକେ କମଲେ ! କୁର୍ୟାତ୍ ସତାଂ ତିରସ୍କାରମ୍ ।
ନିତ୍ୟସୁବୃତ୍ତେନ କଥଂ ନାସାମଣିନା ସତାଂ ତିରସ୍କାରଃ ॥ ୩୩॥
କର୍ଣେନ ତେଽବ୍ଧିକନ୍ୟେ! ତାଟଙ୍କାଦେଃ ପ୍ରତୀୟତେ ଶୋଭା ।
କର୍ଣସ୍ୟ ହି ସ୍ୱଭାବଃ ଶ୍ରୀମନ୍ତଂ ଯତ୍ ସ୍ୱମାଶ୍ରୟଂ କୁରୁତେ ॥ ୩୪॥
ତର୍କୋ ମମାବ୍ଧିକନ୍ୟେ! ହାଟକତାଟଙ୍କଚକ୍ରମର୍କ ଇତି ।
ଯଦ୍ୟେତଦେଷ ନ ସ୍ୟାତ୍ କର୍ଣାସକ୍ତିଃ କଥଂ ଭବେଦସ୍ୟ ॥ ୩୫॥
ଭାତି କପୋଲଃ କମଲେ! ପତ୍ୟୁଃ ଶୃଙ୍ଗାରମଣିମୟାଦର୍ଶଃ ।
ପ୍ରତିଫଲିତତନ୍ମୁଖୋଽୟଂ ହୃଦ ଇବ ସୋଽଧୋବିକସ୍ୱରାମ୍ବୁରୁହଃ ॥ ୩୬॥
ମଧୁରବଚୋଗଣନାୟାଂ ମାତସ୍ତ୍ୱଦ୍ଗୀରଭୂଦିୟଂ ପ୍ରଥମା ।
ନୈବ ଦ୍ୱିତୀୟବାର୍ତା କୋକିଲବାଦେ କୁତୋ ନୁ ପଞ୍ଚମତା ॥ ୩୭॥
ସାମ୍ୟାଭିଲାଷଦୋଷଂ ସମ୍ମାର୍ଷ୍ଟୁଂ ତ୍ୱଦ୍ୱିରା ଚିରାଦିକ୍ଷୋଃ ।
ଚକ୍ରେ ପଞ୍ଚଶରସ୍ତଂ ଚାପାନମନାପଦେଶତଃ ପ୍ରଣତମ୍ ॥ ୩୮॥
ଅର୍ଣବକନ୍ୟେ ! ଧନ୍ୟାମାକର୍ଣୟତସ୍ତ୍ୱଦୀରିତାଂ ବାଚମ୍ ।
ଶୁକପିକବଚନଶ୍ରବଣଂ ଶ୍ରୁତିପୁଟକଟୁ ଦେବି ! କସ୍ୟ ବା ନ ଭବେତ୍ ॥ ୩୯॥
କସ୍ୟ ଗିରସ୍ତେ ଶ୍ରୋତୁଃ କମଲେ ବଦନାରବିନ୍ଦକନ୍ଦଳିତାଃ ।
ନ ଭବେନ୍ମହତୀ ପ୍ରୀତିର୍ନାରଦମେକଂ ବିନା ମୁନୀଶାନମ୍ ॥ ୪୦॥
ମକରନ୍ଦାଃ ସୁନରସାଃ ଶୁକପିକବାଚୋଽପି ବିସ୍ୱରା ଯେନ ।
ବୀଣାଃ ପରିବାଦିନ୍ୟସ୍ତେନ କିଲାବ୍ଜେ ! ତବୋପମା ନ ଗିରାମ୍ ॥ ୪୧॥
ଅମ୍ବାଭିଜାତବାଣୀଧନରସମାଧୁର୍ୟଚୌର୍ୟକାରୀ ତେ ।
ଅତିମର୍ଦନାସହିଷ୍ଣୁର୍ମୁଷିତରସାନେଷ ମୁଞ୍ଚତୀବେକ୍ଷୁଃ ॥ ୪୨॥
ନୀରତୟେବ ମରନ୍ଦୋ ଭାବ୍ୟଶ୍ଶ୍ରବଣେ ତବାବ୍ଧିଜେ ! ବାଚାମ୍ ।
ସ୍ୱାଦିତ ଏବ ସୁଧାୟାଃ ସ୍ୱାଦ୍ୟେତି ଖ୍ୟାତିରପି ନ ମାଧୁର୍ୟାତ୍ ॥ ୪୩॥
ଅଧରେଣ ବନ୍ଧୁଜୀବଂ ମୁଖତଃ ପ୍ରାଭାତିକଂ ଚ ରାଜୀବମ୍ ।
ଦୂରୀକରୋଷି କିଂ ବା ଦେବି ! ତ୍ୱଂ ସର୍ୱଜୀବକରୁଣାର୍ଦ୍ରା ॥ ୪୪॥
ଅନ୍ତେ ବସନ୍ ଦ୍ୱିଜାନାମବଦାତାନାମତିସ୍ଫୁରଦ୍ରୂପଃ ।
ଅମ୍ବ ! ତବାଧିକମଧରୋ ବିମ୍ବପ୍ରତିବିମ୍ବୟୋଗ୍ୟୋଽଭୂତ୍ ॥ ୪୫॥
ସନ୍ତତପଲ୍ଲବୟୋଗେ ମୁକ୍ତିର୍ନ ଶୁଚେରପୀତି ବାଙ୍ ମିଥ୍ୟା ।
ଦେବି! ତବାଧର ପଲ୍ଲବସଂୟୋଗେଽଧ୍ୟମଲା ଦ୍ୱିଜା ମୁକ୍ତାଃ ॥ ୪୬॥
ତବ ତଟିନୀପତିକନ୍ଥେ ! ଦ୍ୱିଜପଟଲୀ ବଦନଶୁକ୍ତିମୁକ୍ତାଶ୍ରୀଃ ।
ଅତନୁୟଶୋବୀଜାନାମଙ୍କୁରପଙ୍କ୍ତିଃ ପରିସ୍ଫୁରନ୍ତୀବ ॥ ୪୭॥
ବଦନଂ ସୁଧାକରସ୍ତେ ବାରିଧିକନ୍ୟେ ! ନ ତତ୍ର ସନ୍ଦେହଃ ।
ବଚନାପଦେଶମେତନ୍ନୋ ଚେଦମୃତଂ କଥଂ ତତଃ ପ୍ରଭବେତ୍ ॥ ୪୮॥
ଭ୍ରୂୟୁଗଳଂ ଭୃଗୁତନୟେ ! କୁସୁମଶରସ୍ୟେବ ସବ୍ୟସାଚିତୟା ।
ଆରୋପିତାକ୍ଷିବାଣଂ କୋଦଣ୍ଡଦ୍ୱନ୍ଦ୍ୱମିତି ମତିଂ ଦତ୍ତେ ॥ ୪୯॥
ଅବ୍ଜଦ୍ୱୟମପି ବିଜିତଂ ତବ କମଲେ! ବକ୍ତ୍ରଶୋଭୟା ତତ୍ର ।
ଅମ୍ବରମେକଂ ଶରଣଂ ଶମ୍ବରମପରଂ ଚ ସତ୍ୱରଂ ପ୍ରାପତ୍ ॥ ୫୦॥
ଚନ୍ଦ୍ରୋଽଭବଦ୍ ବିଷାଦୀ ଚାରୁ ମୁଖଂ ଦେବି! ତାବକଂ ବୀକ୍ଷ୍ୟ ।
କୁକ୍ଷିଗତଂ ଗରମସ୍ୟ ପ୍ରାହୁଃ ପଙ୍କଂ କଳଙ୍କମିତ୍ୟେକେ ॥ ୫୧॥
ବିଜିତସ୍ତ୍ୱନ୍ମୁଖକାନ୍ତ୍ୟା ଦେବି ! ନିରାଶୋ ନିଶାକରୋ ଜୀବେ ।
ଭୃଗୁପତନଂ କୁରୁତେଽସାବସ୍ତମଥ ବ୍ୟାଜତୋଽନ୍ୱହଂ ତୂର୍ଣମ୍ ॥ ୫୨॥
ଅମ୍ବ ! ଯତସ୍ତେ ନିତରାମାନନକାନ୍ତ୍ୟା ତୃଣୀକୃତଶ୍ଚନ୍ଦ୍ରଃ ।
ଆତଃ କିଲ ତୃଣବୁଦ୍ଧୟା ମୁଞ୍ଚତି ନୈନଂ ମୃଗଃ କଦାଚିଦପି ॥ ୫୩॥
ଦେବି ! ତବାନନତୁଲନାମଭିଲଷତାଂ ସାଗସାଂ ସରୋଜାନାମ୍ ।
ମଜ୍ଜନମପ୍ସୁ ଚ ବନ୍ଧଃ ଶୈବଲପାଶେନ ଷଟ୍ପଦୈଃ ପ୍ରସୃତିଃ ॥ ୫୪॥
ଦ୍ୱିଜରାଜସ୍ୟାପ୍ୟବ୍ଜେ ! ତ୍ୱଦ୍ୱକ୍ତ୍ରେଣୋପମାନରହିତେନ ।
ସମତାଭିଲାଷଦୋଷାଦ୍ଦୋଷାକରତା ବିଧୋର୍ଦୁରନ୍ତାଭୃତ୍ ॥ ୫୫॥
ପଦ୍ମେ ! ପରସ୍ୱହରଣଂ ଦୋଷାୟେତି ପ୍ରଭାଷଣଂ ମିଥ୍ୟା ।
ଅପହୃତ୍ୟ ରାଜଲକ୍ଷ୍ମୀମପଦୋଷଂ ଯଦ୍ୱିଭାତି ତେ ବକ୍ତ୍ରେମ୍ ॥ ୫୬॥
ନିର୍ଜିତ୍ୟ ନୀରଜାତଂ ନିଖିଲଂ ମୁରବୈରିସୁନ୍ଦରି ! ମୁଖେନ ।
ଆସନମାକଲିତଂ ତେ ନୂନଂ ପଦ୍ମାସନାସି ତେନୈବ ॥ ୫୭॥
ତ୍ୱଦ୍ୱଦନାଭିଭବୋଦ୍ୟତ୍ତାପାତିଶୟଂ ଦିବାନିଶଂ ପଦ୍ମମ୍ ।
ଅମ୍ଭସି ବାସଂ କୁରୁତେ ନୂନଂ ତସ୍ୟାପନୋଦନାୟାବ୍ଜେ ! ॥ ୫୮॥
ସନ୍ତତମିତ୍ରବିରୋଧୀ ଦୋଷାସକ୍ତଃ କଲଙ୍କବାନିନ୍ଦୁଃ ।
ତବ ବଦନେନ କଥଂ ବା କମଲେ! କଲ୍ୟାଣଗୁଣଭୁବା ତୁଲ୍ୟଃ ॥ ୫୯॥
ଦେବି! ତବାନନଚନ୍ଦ୍ରପ୍ରସାଦଭିକ୍ଷାଟନେନ ରାଜାପି ।
ପୂର୍ଣଶ୍ଚନ୍ଦ୍ରିକୟାହୋ ଜୀବଞ୍ଜୀବସ୍ୟ ତୃପ୍ତିମାତନୁତେ ॥ ୬୦॥
ତ୍ୱତ୍କଣ୍ଠକାନ୍ତିଭାଗ୍ୟଂ ଦୃଷ୍ଟ୍ୱା ଶଙ୍ଖାସ୍ସହସ୍ରଶୋ ଦେବି ! ।
ତଲ୍ଲାଭାୟ ପୟୋଧେରନ୍ତଂ ଗତ୍ୱା ଚିରଂ ତପସ୍ୟନ୍ତି ॥ ୬୧॥
କଣ୍ଠେନ ତେ ହୃତଶ୍ରୀଃ କମଲେ ! ବିମଲୋଽପି ସନ୍ତତଂ କମ୍ବୁଃ ।
ଘୁମୁଘୁମୁନିନଦବ୍ୟାଜାତ୍ କ୍ରୋଶତି ରାଜ୍ଞାଂ ପୁରଃ ସମୟଦର୍ଶୀ ॥ ୬୨॥
ତ୍ୱତ୍କଣ୍ଠକାନ୍ତିଜନିତଂ ଭଞ୍ଜନମାଖ୍ୟାତୁମୁଦ୍ୟତା ଜଲଜାଃ ।
ବିସ୍ତୃତଜନଶବ୍ଦତୟା ପଦ୍ମିନ୍ୟାମ୍ରେଡୟନ୍ତି ଭଂ ଭମିତି ॥ ୬୩॥
କମ୍ବୁଭ୍ରମେଣ କଣ୍ଠଂ ଚକ୍ରଭ୍ରାନ୍ତ୍ୟା ନିତମ୍ବବିମ୍ବମପି ।
ପରିମୃଶତି ତେ କରାଭ୍ୟାଂ ପତିରତିଦୁର୍ଭେଦଶଙ୍ଖଚକ୍ରାଭ୍ୟାମ୍ ॥ ୬୪॥
ବାହୂ ଶିରୀଷମାଲାମାର୍ଦବକୀତନ୍ଦୁମର୍ଦନେ ରାହୂ ।
ସେତୂ ସମଗ୍ରଶୋଭାସିନ୍ଧୋର୍ମନ୍ୟେ ସମୁଦ୍ରକନ୍ୟେ ! ତେ ॥ ୬୫॥
ଅତିସୁରଭିଃ କରପଦ୍ମୋ ବାଞ୍ଛିତଦାନୈର୍ନ କେବଲଂ ଗନ୍ଧୈଃ ।
ବାରିଧିପୁତ୍ରି ! ବଦାନ୍ୟଂ କବିମୁକ୍ତଂ ଦେବି! କଲ୍ପମାତନୁତେ ॥ ୬୬॥
ଦେବି ! କରେଣ ଭବତ୍ୟା ଦତ୍ତସମସ୍ତେପ୍ସିତେନ ଭକ୍ତାନାମ୍ ।
ସ୍ପର୍ଶନଦୂରୀକରଣଂ ସୋଦରଗୀର୍ୱାଣଶାଖିନାମୁଚିତମ୍ ॥ ୬୭॥
ଦେବି ! ତବାନନଭାସା ପରିଭୂତଃ ପର୍ୱଚନ୍ଦ୍ରମା ନୂନମ୍ ।
ତେନ ହି ଶଶ୍ୱତ୍ ପରିଧିବ୍ୟାଜପ୍ରାକାରମଧ୍ୟମଧ୍ୟାସ୍ତେ ॥ ୬୮॥
ପଦ୍ମକୁଲଂ ପରିଭୂତଂ ପଦ୍ମେ ! ତ୍ୱତ୍ପାଣିପଦ୍ମରାଗେଣ ।
ତତ୍ପ୍ରେଷିତଂ ସଦୈକଂ ତ୍ୱତ୍ପାଣିଂ ସେବତେ ସରୋଜାତମ୍ ॥ ୬୯॥
ଅନୁଦିନମର୍କାଭିମୁଖଂ ବନଭୁବି ଶୈବାଲବଲ୍କଲଂ କମଲମ୍ ।
ତପ୍ତ୍ୱା ତପୋଽତିତୀବ୍ରଂ ପ୍ରାପତ୍ ତ୍ୱତ୍ପାଣିପଦ୍ମସାଧର୍ମ୍ୟମ୍ ॥ ୭୦॥
ହାରା ବିଭାନ୍ତି ଗୌରା ହରିଦୟିତେ ! ତେ ମୁଖୋଡୁରାଜସ୍ୟ ।
ସେବାର୍ଥମାଗତାନାଂ ତାରାଣାମିବ ଗଣାଃ ପୁରୋଗାଣାମ୍ ॥ ୭୧॥
ହାରଲତା ତବ ପଦ୍ମେ ! ସୁକୁମାରସ୍ୟାଙ୍ଗଭୂକୁମାରସ୍ୟ ।
କ୍ରୀଡାମୃଣାଳଡୋଳାଶଙ୍କାଂ ନାଙ୍କ୍ରୂରୟତ୍ୟସୌ କସ୍ୟ ॥ ୭୨॥
ତବ କୁଚଗିରିତଟବାସୀ କୃତରୋମାଳୀନକନ୍ୟକାସ୍ନାନଃ ।
କଶ୍ଚନ ମୁକ୍ତାହାରୋ ଯୋଗୀବାଭାତି ନିତ୍ୟଶୁଦ୍ଧାତ୍ମା ॥ ୭୩॥
ଉନ୍ନତିମୁରୋଜୟୁଗ୍ମେ ! ପଦ୍ମେ ଦୃଷ୍ଟୈବ ପର୍ୱତାସ୍ତ୍ରପୟା ।
ଉଦଧୌ ଚିରଂ ନିଲୀନା ଭୀତ୍ୟା ଶକ୍ରାଦିତି ପ୍ରଥାମାତ୍ରମ୍ ॥ ୭୪॥
ତବ କୁଚକୁମ୍ଭଦ୍ୱନ୍ଦ୍ୱେ ବଦ୍ଧସ୍ପର୍ଧାନି ଡାଡିମଫଲାନି ।
ତୁଲନାହୀନାଃ କୀରାସ୍ତୁଣ୍ଡୈରେତାନି ଖଣ୍ଡୟନ୍ତ୍ୟବ୍ଜେ ! ॥ ୭୫॥
କୋଦଣ୍ଡସ୍ୟ ପୁରାରେରୁଦ୍ଦଣ୍ଡସ୍ୟାପି ହନ୍ତ ବାଣସ୍ୟ ।
କବଳୀକୁରୁତେ ମାନଂ ପୁଗଳୀ କୁଚୟୋସ୍ତବେନ୍ଦିରେ ! ଯୁଗପତ୍ ॥ ୭୬॥
ସନ୍ତତମୁକ୍ତାହାରାବପି ତବ ପୀନୌ ପୟୋଧରୌ ଭାତଃ ।
ତେନ କଥଂ ପୀନତ୍ୱଂ ଦେବି ! ଭବେଦ୍ରାତ୍ରିଭୋଜନେ ମାନମ୍ ॥ ୭୭॥
କନକମହୀଘରଗୌରବକବଲୀକରଣାଦିବାତିପୀନମପି ।
ମୁକ୍ତାହାରବଦାସ୍ତେ ସ୍ତନୟୁଗଲଂ ଦେବି ! ତାବକଂ ଚିତ୍ରମ୍ ॥ ୭୮॥
ଇତି କିଲ ଦର୍ଶନରୀତିଃ କାର୍ୟମୁପାଦାନକାରଣାଭିତ୍ରମ୍ ।
ଦେବି! ତବ ସ୍ତନକୁମ୍ଭୌ ଚକ୍ରାଭିନ୍ନୌ କଥଂ ନ ଦୃଶ୍ୟେତେ ॥ ୭୯॥
କଲୟତି ଦଣ୍ଡଃ କଲଶଂ ସର୍ୱୈର୍ବହୁଶଃ ଶ୍ରୁତଂ ଚ ଦୃଷ୍ଟଂ ଚ ।
ଜନନି ! ତବ ସ୍ତନକଲଶୋ ଜନୟତି ମଧୁବୈରିମାନଦଣ୍ଡମହୋ ! ॥ ୮୦॥
ସର୍ୱାରୀଣାଂ ଜେତା ଦୁର୍ୱାରେଣୈବ ଦେବି! ଚକ୍ରେଣ ।
ହନ୍ତ କଥଂ ତେ ବିଜିତଃ କାନ୍ତୋ ବକ୍ଷୋରୁହାତ୍ମଚକ୍ରେଣ ॥ ୮୧॥
କଲ୍ଲୋଲିନୀଶକନ୍ୟେ ! କଲୟେ ରୋମାବଲିପ୍ରଭେଦେନ ।
ତବ କାନ୍ତିବାର୍ଧିମଧ୍ୟେ ନବଜଲଦଶ୍ୟାମକୋ ହରିଃ ଶେତେ ॥ ୮୨॥
ନାମୀସରୋବନାନ୍ତଃ କ୍ରୀଡନ୍ମଦନଦ୍ୱିପାଧିପୋତ୍କ୍ଷିତାମ୍ ।
ଶୈବାଲବଲ୍ଲରୀଂ ତେ ରୋମଲତାଂ ଦେବି ! କଥୟନ୍ତି ॥ ୮୩॥
ମଧ୍ୟଃ ପ୍ରଥମଂ ମାନଂ ମହିତଗୁଣୌଘସ୍ତବାନୁମାନମପି ।
ବପୁରପ୍ୟୁପମିତିଶବ୍ଦଂ ଦୂରୀକୁରୁତେଽମ୍ବ ! କେନ ବର୍ଣ୍ୟାସି ॥ ୮୪॥
ତବ କୁଚକୁମ୍ଭସ୍ୟ ଗୁରୋରନ୍ତେବାସୀ ବିବେକହୀନସ୍ୟ ।
ଦର୍ଶନୟୋଗ୍ୟୋ ନାଭୂନ୍ମଧ୍ୟସ୍ତେ ଦେବି ! ନାସ୍ତିବାଦରତଃ ॥ ୮୫॥
ପ୍ରତ୍ୟକ୍ଷାବିଷୟତ୍ୱାଦତିରିକ୍ତତ୍ୱାଦନଙ୍ଗଜନକତ୍ୱାତ୍ ।
ଦେବି ! ବଲିଶ୍ରୀଭଜନାନ୍ମଧ୍ୟସ୍ତେ କାନ୍ତବିଭ୍ରମଂ ତନୁତେ ॥ ୮୬॥
ଚିନ୍ତାମଣିବାଦସ୍ତେ କରୟୋର୍ଦ୍ଦଶି କାମଶାସ୍ତ୍ରବାଦୋଽବ୍ଜେ ! ।
ମଧ୍ୟେ ମାୟାବାଦୋ ଗୌରବବାଦଃ ପୟୋଧରଦ୍ୱନ୍ଦ୍ୱେ ॥ ୮୭॥
ମହଦଣୁପରିମାଣଗତଂ ବିଶ୍ରାନ୍ତଂ ଦେବି ତାରତମ୍ୟଂ ତେ ।
ବକ୍ଷୋରୁହେ ଚ ମଧ୍ୟେ ନ ବ୍ୟୋମାଦୌ ନ ଚାପି ପରମାଣୌ ॥ ୮୮॥
କଠିନାତ୍ମାଘଃ କୁରୁତେ ସର୍ୱଂ କମଲେ! କୃଥଂ ସନାମିଗତମ୍ ।
ଦୃଷ୍ଟମିତୀଦମୁରୋଜେ ମଧ୍ୟଂ କୃଶମେବ କୁର୍ୱତି ସ୍ପଷ୍ଟମ୍ ॥ ୮୯॥
ତୁଙ୍ଗପୟୋଧରଶୈଲଦ୍ୱନ୍ଦ୍ୱୋଦ୍ୱହନେନ ସନ୍ତତଂ ଦେବି ! ।
ପଶ୍ୟାମି କାର୍ୟମୁଚିତଂ ମଧ୍ୟସ୍ୟ ଶ୍ରୀମତୋଽପି ତେ ମାତଃ ! ॥ ୯୦॥
ତବ ରୋମରାଜିୟମୁନାନିତ୍ୟସ୍ଫୀତେଽପି ମଧ୍ୟଦେଶେଽସ୍ମିନ୍ ।
କ୍ଷାମକଥା କଥମବ୍ଜେ ! ନାଭୀସରସୀପରିଷ୍କୃତେଽପି ସଦା ॥ ୯୧॥
ରୋମାଳିୟୂପଦଣ୍ଡେ ଚିତପଶୁଂ ବଦ୍ଧୁମମ୍ବ ! ତେ ପତ୍ୟୁଃ । (ବନ୍ଧୁମମ୍ବ)
ସମ୍ପାଦିତେବ ରଶନା ତ୍ରିବଲିମିଷେଣାଙ୍ଗଜନ୍ମନାଧ୍ୱରିଣା ॥ ୯୨॥
ଆଭାତି ନାଭିରବ୍ଜେ ! ତବ ତନୁଜନୁଷା ନିଷାଦବୀରେଣ ।
ପାତୟିତୁଂ ହରିଚିତ୍ତଂ ମତ୍ତଭଂ ସମ୍ଭୃତୋ ଯଥା ଗର୍ତଃ ॥ ୯୩॥
ଶଙ୍କେ ତବାମ୍ବ ! ନାଭିଂ ଶମ୍ବରରିପୁଣା ବିଜିତ୍ୟ ଦୈତ୍ୟାରିମ୍ ।
ରୋମାଳିନୀଲରତ୍ନସ୍ତମ୍ଭନିଖାତାୟ ସମ୍ଭୃତଂ ବଭ୍ରମ୍ ॥ ୯୪॥
ନିବସନ୍ତି ଯେଽଧିକାଞ୍ଚି ପ୍ରାୟଃ ଶୁଦ୍ଧା ଭବନ୍ତି ତେ ମୁକ୍ତାଃ ।
ଇତି ମଣିରଶନାମ୍ବିକସନ୍ମୁକ୍ତାବଲ୍ୟାମ୍ବ ! ଦର୍ଶୟସ୍ୟଦ୍ଧା ॥ ୯୫॥
ଅବନତମୌଲିରିୟଂ ତ୍ୱାମଞ୍ଜଲିମଭିନୀୟ କୁସୁମକୋଶମିଷାତ୍ ।
ରମ୍ଭା ତବୋରୁବିଜିତା ସମ୍ଭାବୟତୀତି ମେ ତର୍କଃ ॥ ୯୬॥
କୁମ୍ଭୀନ୍ଦ୍ରକୁମ୍ଭବୃତ୍ତଂ ଜାନୁଦ୍ୱନ୍ଦ୍ୱଂ ତବାପ୍ରତିଦ୍ୱନ୍ଦ୍ୱମ୍ ।
ହନ୍ତ ହରେରପି ଧୈର୍ୟଂ ହରତେ ଦୁର୍ଧର୍ଷମବ୍ଧିରାଜସୁତେ ! ॥ ୯୭॥
ଜଙ୍ଘା ନିଷଙ୍ଗଶଙ୍କାମଙ୍କୂରୟତ୍ୟଙ୍ଗଜେନ୍ମନୋ ଦେବି ! ।
ତତ୍ ଖଲୁ ତଦଗ୍ରଭାଗେ ପଶ୍ଚଶରସ୍ଫୂର୍ତିମଙ୍ଗୁଲିବ୍ୟାଜାତ୍ ॥ ୯୮॥ (ସ୍ଫୂର୍ତିରଙ୍ଗୁଲିବ୍ୟାଜାତ୍)
ତବ ପଦଭାବଃ ପ୍ରାପ୍ତସ୍ତାମରସେନେତି ନାତ୍ର ସନ୍ଦେହଃ ।
କଥମନ୍ୟଥା ସ ଯୋଗୋ ଭାବୀ କାନ୍ତେନ ହଂସକେନାବ୍ଜେ ! ॥ ୯୯॥
ପାଦତଲେ ପରିଦୃଶ୍ୟଂ ପଦ୍ମେ ! ରେଖାତ୍ମନା ସ୍ୱୟଂ ଗୂଢମ୍ ।
ତବ ଚରଣଶ୍ରୀମିକ୍ଷାଚରଣଂ ବିଦଧାତି ସଜ୍ୟମମ୍ବୁରୁହମ୍ ॥ ୧୦୦॥ (ସତ୍ୟମମ୍ବୁରୁହମ୍)
ଅର୍କୋଽପି ଯସ୍ୟ ଭଜନାଦଜନି ଶ୍ରୀମାନନେନ ଜନିତଶ୍ରୀଃ ।
ପଦ୍ମଂ କଥଂ ନୁ ତୁଲନାମର୍ହତି ପାଦେନ ତାବକେନାବ୍ଜେ ! ॥ ୧୦୧॥
ଜଲଜଂ କୃତସଙ୍କୋଚଂ ଦ୍ୱିଜରାଜସ୍ଥାପି ଦର୍ଶନେ ଦେବି ! ।
ମାନିତମଧୁପଂ ଶିରସା କଥମଧିରୋହେତ୍ ପଦେନ ତେ ତୁଲନାମ୍ ॥ ୧୦୨॥
ସାମ୍ରାଜ୍ୟେଽମ୍ବୁରୁହାଣାଂ ତବ ପଦମୀଡେଽଭିଷିଚ୍ୟମାନମିବ ।
ଜାନୁସ୍ମୃତାଂ ଜନାନାଂ ହେତୁଃ ସଞ୍ଚିନ୍ତିତାର୍ଥସିଦ୍ଧୀନାମ୍ ॥ ୧୦୩॥ (ଜାତିସ୍ମୃତାଂ)
ମଦନଦରୀଜନକବରୀନଲିନୈରୁଦ୍ୟନ୍ମରନ୍ଦସଂସାରେ (?) ।
ପାତୁ ପରାକୃତପଦ୍ମଂ ମାତୁର୍ଜଗତାଂ ପଦାମ୍ବୁଜାତଂ ମାମ୍ ॥ ୧୦୪॥
ସମ୍ଭାବିତାପଚାରଂ ଜ୍ଞାନାଜ୍ଞାନାତ୍ତବ ସ୍ତୁତିବ୍ୟାଜାତ୍ ।
ଦେବି ସହସ୍ୱ ଦୟାଲୋ ! ଦେହି ମମ ଶ୍ରୀପତୌ ପରାଂ ଭକ୍ତିମ୍ ॥ ୧୦୫॥
ଜଗତି ଖ୍ୟାତିରଶେଷାତ୍ତ୍ୱକୁଲେୟେତି ସର୍ୱସିଦ୍ଧାନ୍ତମ୍ ।(?)
ଜନନି କଥଂ ତେ ଖ୍ୟାତେରୁତ୍ପତ୍ତିଃ ଶ୍ରୂୟତେ ପୁରାଣାଦୌ ॥ ୧୦୬॥
ଯଜ୍ଞବରାହଃ ଶ୍ରୀମାନ୍ ବାଧୂଲମ୍ବାଲଜୋ ଧୀମାନ୍ ।
ଲକ୍ଷ୍ମୀ ଶତକମତାନୀଦକ୍ଷୀଣାନନ୍ଦକନ୍ଦଳୀକନ୍ଦମ୍ ॥ ୧୦୭॥
ଇତି ଯଜ୍ଞବରାହକୃତଂ ଲକ୍ଷ୍ମୀଶତକଂ ସମ୍ପୂର୍ଣମ୍ ।
.
Comments
Post a Comment