ଲକ୍ଷ୍ମୀନୃସିଂହସୁପ୍ରଭାତବିଂଶତିଃ
ଲକ୍ଷ୍ମୀନୃସିଂହସୁପ୍ରଭାତବିଂଶତିଃ
ପରାଙ୍କୁଶମୁନି ବିରଚିତା
ଅମ୍ବ ପ୍ରସନ୍ନଶରଦିନ୍ଦୁମୁଖି ପ୍ରପନ୍ନ-
ପଙ୍କଚ୍ଛଟାଦଲନପାଦସରୋଜୟୁଗ୍ମେ ।
ଲକ୍ଷ୍ମୀନୃସିଂହପରିରମ୍ଭଣରମ୍ୟଗାତ୍ରେ
ଲକ୍ଷ୍ମୀନୃସିଂହଦୟିତେ ତବ ସୁପ୍ରଭାତମ୍ ॥ ୧॥
ଭାନୁଃ ସ୍ୱଭାନୁପରିରମ୍ଭଣଜୃମ୍ଭଦବ୍ଜ-
ପାଲିର୍ୱଲାରିହରିଦଙ୍ଗଣମେତି ଦୀବ୍ୟନ୍ ।
ଶଶ୍ୱଦ୍ ବିନଶ୍ୟତି ଚ ନୈଶମିଦଂ ତମିସ୍ରଂ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୨॥
ଯଃ ପଦ୍ମିନୀଂ ସ୍ୱବିରହେଣ କଲଙ୍କିସଙ୍ଗ-
ଭୀତ୍ୟେବ ସଙ୍କୁଚିତନାଲକରାବ୍ଜବକ୍ତ୍ରାମ୍ ।
ଆଶ୍ୱାସୟନ୍ନୁଦୟମେତି ମୁହୁଃ କରାଗ୍ରୈ-
ର୍ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୩॥
ଦୋଷାକରୋ ନିଶି ପୟୋଜସୁହୃଦ୍ୱିୟୋଗ-
ଦୂରାଂ ସ୍ପୃଶନ୍ ନିଜକରୈର୍ନଲିନୀଂ ବିଭାତେ ।
ମିତ୍ରେଣ ଦୃଷ୍ଟ ଉପଧାବ୍ୟ ନିଲୀୟତେଽବ୍ଧୌ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୪॥
ଭାବତ୍କପାଦନଖଚନ୍ଦ୍ରରୁଚିଦ୍ରବତ୍ସ୍ୱ-
ଭାବୋଚ୍ଚଲନ୍ନୟନନିଃସୃତବାଷ୍ପପୂରାଃ ।
ବିପ୍ରା ହରିର୍ହରିରିତି ସ୍ଫୁଟମୀରୟନ୍ତି
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୫॥
ଗମ୍ଭୀରବାରିଭବପଙ୍କଜପତ୍ରନେତ୍ରଂ
ଧ୍ୟାତ୍ୱା ଦ୍ୱିଜାସ୍ତରଣିମଣ୍ଡଲମଣ୍ଡନଂ ତ୍ୱାମ୍ ।
ଅର୍ଘ୍ୟଂ ଭବତ୍ପଦସରୋଜୟୁଗେ କ୍ଷିପନ୍ତି
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୬॥
ଆସନ୍ନତିମ୍ମକରଗର୍ଭତୟେବ ଶକ୍ର-
କାଷ୍ଠାମୁଖଂ ବିଲୁଲିତୋଡୁଗଣାଗ୍ର୍ୟଜାଲମ୍ ।
ଦୂରୀକୃତେନ୍ଦୁତିଲକଂ ପ୍ରବିଭାତି ପାଣ୍ଡୁ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୭॥
ବିପ୍ରାସ୍ତ୍ରଭିନ୍ନକରକନ୍ଧରସନ୍ଧିବନ୍ଧ-
ମନ୍ଦେହଦେହନିବହୈରିବ ମେଘଖଣ୍ଡୈଃ ।
ମୁକ୍ତଃ ପୁରା ସ୍ୱୟମୁଦେତି ବିୟଦ୍ ଦିନେଶୋ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୮॥
ପଦ୍ମାଲୟେଷୁ ଗୃହିଣୋ ନିୟତାଃ ପ୍ରଭାଭିଃ
କିଞ୍ଜଲ୍କକର୍ମଠଗଣା ମକରନ୍ଦଭିକ୍ଷାମ୍ ।
ବିଶ୍ରାଣୟନ୍ତ୍ୟଲିବଟୁଭ୍ୟ ଉପାଗତେଭ୍ୟୋ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୯॥
ଦୂରଂ ଗତେ କୁମୁଦିନୀ ରମଣେଽତିମତ୍ତ-
ଗାୟନ୍ମଧୁବ୍ରତହଠାତ୍କରଣାତିଭୀତା ।
ଦ୍ୱାରଂ ଗୃହସ୍ୟ ପିଦଧାତି ଦଲାରରେଣ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୦॥
ଶ୍ରୀରଙ୍ଗନାଥଶଠଜିଦ୍ଗୁରୁସାର୍ୱଭୌମାଃ
କୃତ୍ୱାହ୍ନିକଂ ଭୁବନମଙ୍ଗଲମାଦରାତ୍ ତ୍ୱାମ୍ ।
ଉଦ୍ବୋଧୟନ୍ତି ବିଜୟୀ ଭବ ମାଧବେତି
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୧॥
ଅମ୍ଭୋଜିନୀ ନିଜକରୈଃ କମନେ ସୁଦୂରା-
ଦାଗତ୍ୟ ତାଡୟତି ପତ୍ରକବାଟମାଶୁ ।
ଉଦ୍ଧାଟ୍ୟ ପୃଚ୍ଛତି ସୁଖାଗମନଂ ମିଲିନ୍ଦୈ-
ର୍ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୨॥
ସନ୍ତସ୍ତ୍ୱଦୀୟପଦପଙ୍କଜବନ୍ଦନାଭି-
ର୍ଧ୍ୟାନାର୍ଚନସ୍ତୁତିନମସ୍କୃତିବଦ୍ଧଭାବାଃ ।
ତ୍ୱାଂ ସର୍ୱଲୋକଶରଣଂ ପ୍ରଣମନ୍ତି ଭୂୟୋ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୩॥
ଧ୍ୟାୟନ୍ତି ଭାନ୍ତି ପରିୟନ୍ତି ବଦନ୍ତି ସନ୍ତି
ତିଷ୍ଠନ୍ତି ଯାନ୍ତ୍ୟଭିନମନ୍ତି ସମାହ୍ୱୟନ୍ତି ।
ଆକର୍ଣୟନ୍ତ୍ୟନୁବଦନ୍ତି ନୁବନ୍ତି ସନ୍ତୋ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୪॥
ଗାୟନ୍ତି ଭୃଙ୍ଗନିବହାଃ ସରସୀରୁହେଷୁ
ଭ୍ରାମ୍ୟନ୍ତି ପାନ୍ଥନିଚୟାସ୍ତରୁଣୀଜନେଷୁ ।
ଆୟାନ୍ତି ମନ୍ଦମରୁତସ୍ତଟିନୀତଟେଷୁ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୫॥
ମତ୍ତା ଗଜେନ୍ଦ୍ର ବିସରରାସ୍ତୁରଗୈର୍ନଦନ୍ତ୍ୟୁ-
ନ୍ନୃତ୍ତାସ୍ତୁରଙ୍ଗତତୟଃ ପ୍ରଚରନ୍ତି ସୋକ୍ଷାଃ ।
ଦୃପ୍ତା ମହୋକ୍ଷନିକରାଃ ପ୍ରଭଜନ୍ତି ଧେନୂ-
ର୍ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୬॥
କାକାଃ ପ୍ରୟାନ୍ତି କୁହରାଣି ପୁରୀଗୃହାଣାଂ
ଘୂକାଃ ପ୍ରୟାନ୍ତି କୁହରାଣି ମହୀରୁହାଣାମ୍ ।
କୋକାଃ ପ୍ରୟାନ୍ତି କୁହରାଣି ସରୋରୁହାଣାଂ
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୭॥
ଡୋଲୋତ୍ସବେ ସୁରଗଣୈରଶିତେଷୁ ତାରା-
ଦୁଗ୍ଧାନ୍ନଖଣ୍ଡନିବହେଷ୍ୱଜମୁଖ୍ୟଦେୟାଃ ।
ଭାଗା ଇବେନ୍ଦୁଧିଷଣୋଶନସଃ ପ୍ରୟାନ୍ତି
ଲକ୍ଷ୍ମୀନୃସିଂହ ଭଗବନ୍ ତବ ସୁପ୍ରଭାତମ୍ ॥ ୧୮॥
ବିଧିଶଙ୍କରଶକ୍ରବିଭାବିତ ଭୋ
ବିଜିତାମରବୈରିକଦମ୍ବ ବିଭୋ ।
ବିବିଧାଗମସାରବିହାର ହରେ
ବିଜୟୀ ଭବ ଦେବ ରମାନୃହରେ ॥ ୧୯॥
ଝଷ କୂର୍ମ ବରାହ ବଟୋଽରିପଟୋ
ଭୃଗୁନନ୍ଦନ ରାଘବ ଧେନୁକହନ୍ ।
ବସୁଦେବସୁତାନଘ କଲ୍କିତନୋ
ବିଜୟୀ ଭବ ଦେବ ରମାନୃହରେ ॥ ୨୦॥
ରଙ୍ଗାଧିରାଜଶଠଜିଦ୍ଗୁରୁପାଦପଦ୍ମ-
ଭୃଙ୍ଗଃ ପରାଙ୍କୁଶୟତୀନ୍ଦ୍ରତପୋଧନେଶଃ ।
ହୃଦ୍ୟଂ ତତାନ ନତମଙ୍ଗଲଦାୟି ପଦ୍ମା-
ସଦ୍ମାୟିତାଙ୍କନରକେସରିସୁପ୍ରଭାତମ୍ ॥ ୨୧॥
ଇତି ମହାଦେବବିରଚିତା ଶ୍ରୀଲକ୍ଷ୍ମୀନୃସିଂହସୁପ୍ରଭାତବିଂଶତିଃ ସମାପ୍ତା ।
ସ୍ତୋତ୍ରସମୁଚ୍ଚୟଃ ୨ (୭୩)
.
Comments
Post a Comment